6 years ago
  • ما قبل الحمل
القصة حقيقية وصارت بدمشق بعهد الدولة العثمانية عام ١٨٩٨ وكان والي الشام هديك الايام مصطفى عاصم باشا بهي السنة زار دمشق الامبراطور الالماني غليوم التاني وزوجته،🤴🏼👸🏼 وطلعت كل اهالي الشام ومعهم الوالي ليستقبلوا الامبراطور واحتفلو فيه احتفال عظيم وبينما الامبراطور ومرتو عم يتمشو وصلو للقلعة ولمحت (شاهدت) زوجة الامبراطور غليوم حمار أبيض عند باب القلعة وعجبها كتير لدرجة طلبت من والي الشام عاصم باشا أن يعطيها هالحمار اعزكم الله لتاخدو معها ذكرى جميل لبرلين.. راح والي الشام بنفسو يدور بالسوق عن صاحب الحمار الأبيض اللي عجب زوجة الامبراطور ولقاه رجال بسيط اسمو ابو الخير تللو سلّم عليه وحكالو الحمار اللي عندك يا أبو الخير عجب زوجة الامبراطور وانا طالب منك تهديها اياه..💂🏻‍♂️ رفض أبو الخير طلب الوالي وقال: آسف يا افندينا ما بقدر اعطي هالحمار لزوجة الامبراطور 👲🏻 غضب الوالي عاصم باشا من ابو الخير وقلو أنا بشتريه منك بالسعر اللي بدك إياه 😡 قال أبو الخير للوالي آسف يا سيدي، عندي ست رؤوس من الخيول العربية الأصيلة اذا شئت قدمتها كلها لزوجة الأمبراطور غليوم لكن الحمار اعذرني ما راح بيعو ولا راح اهديها إياه استغرب والي الشام من أبو الخير وسألو شو السبب طيب وهي الخيول الواحد منها بيشتري مئة حمار وعادي عندك تهديهم أما الحمار لا 🤔 رد أبو الخير ع الوالي وقال : جناب الوالي (حضرة الوالي) إذا الامبراطورة اخذت الحمار لبلادهم رح تكتب كل الصحف عنو ويسألو من وين هالحمار ويجاوبوهم من الشام ويصيرو يقولو الحمار الشامي ويصبح الحمار الشامي حديث كل الناس ورح يضحكوا علينا ويسخروا منا ويقولو معقولة زوجة الامبراطور ماعجبها بكل الشام إلا هالحمار لتاخدو معها لبرلين 😂😂 وأنا من حرصي وخوفي ع سمعة أهل الشام ما بدي حدا يحكي علينا ويقولو ما عندنا شي يعجب الأمبراطورة الا الحمير طبعا عاصم باشا عجبو حكي أبو الخير وقدم إليه الشكر على نباهتو وحرصو ع سمعة أهل الشام واعتذر عاصم باشا من الأمبراطور والإمبراطورة وحكالهم القصة والسبب لرفض ابو الخير يعطيهم الحمار وضحكوا كتير من نباهة أبو الخير وأصر امبراطور المانيا أنو يمنح أبو الخير هدية رمزية كنوع من التكريم لأنو بحب بلدو دمشق 😊 وأبو الخير قدّم للأمبراطورة خيل عربي أصيل هدية بدال الحمار اللي كان عاجبها 🐎 واصبح أبو الخير تللو مضرب مثل في دمشق والناس كلها بتعرفو وأصبحت سيرتو تنحكى للأولاد والاحفاد... يا ريت في حدا هلأ بخاف ع دمشق متل أبو الخير لكانت الشام بألف خير 🌸 @user-442529 كما وعدتك أتمنى تعجبك 🌺

55 تعليقات

العضوة: 643596 , 6 years ago

سمعانة هالقصة يمكن بمسلسل اهل الراية ياريت نرجع لحضن بلدنا ما في أحن وأدفى منو❤☹😔

العضوة: 657905 , 6 years ago

@user-643596 منورة راما كيفك وكيف ابنك للأسف ما حضرت اهل الراية بس القصة سمعتها من جدي الله يرحمو لمن كان عمري ١٧ سنة الله يفرجها ع سورية ونرجع كلنا نعيش بأمان وسعادة متل قبل الحرب ♥️😔

العضوة: 643596 , 6 years ago

@user-657905 بوجودك حبيبتي كيفك انتي الحمد لله انا وابني بخير كلك زوق ياريت نرجع انا وعم اكتب هالكلمة البي احترق الله كريم بتعرفي وقت بدي اتذكر شي حلو بتذكر ايام سوريا وجمعة العيلة بحس الذكريات الحالية مو حقيقة وما بتترك بصمة جواتي😌

العضوة: 657905 , 6 years ago

@user-643596 دووم بخير ي رب انا منيحة الحمدلله 🌹 كل مر سيمر بإذن الله سلامة قلبك وان شاء الله بترجع هالأيام الحلوة ربنا كريم ♥️

العضوة: 643596 , 6 years ago

@user-657905 الله يسمع منك كيفها بنوتك نشالله ما عم تعزبك ولا ليكون هية مسهرتك لهلق

العضوة: 657905 , 6 years ago

@user-643596 الحمدلله بتبوس خدك في غيرها يسهرني ههههه والله شكلها تعودت ع الشيل والحضن لان ابوها ما عم يشتغل هالفترة بسبب الحظر واغلب الوقت بتظل بحضنو 😂 اي تعودت نحملها

العضوة: 643596 , 6 years ago

@user-657905 الله يخليلك ياها هههه متل ابني كان لعبة العيلة بإعتبارو اول حفيد وما حدا اكلها غيري تعود عالحمل وكسرلي ضهري وهلق حامل عم لاقي صعوبة بشكل مو طبيعي

العضوة: 643596 , 6 years ago

@user-657905 اخدت درس قلت بس ولدت ما رح خلي حدا يحمل البيبي لو بدو يصير زعل لانو عنجد ما كان ابني ينام لاحملو وهزو وما بيرضع غير انا حاملتو وعم اتمشى في يا بعدي هلكت

العضوة: 688499 , 6 years ago

اصعب شعور بلدنيا لما تكون بلادك خربت بسبب الفساد والمفسدين والي يبيعوها بلفلوس الله يفرج عليكم وعلينا وعلى كل بلد عربي

العضوة: 657905 , 6 years ago

@user-643596 الله يخليلك اياه يا رب وتولدي بالسلامه فعلا ما بياكلها غير الام هههه قولي انا بغربة ما عندا حدا الا زوجي ومو اول بنت هي التالته بس سبحان الله شو متعلق فيها ابوها لدرجة بتغفل بحضنو بس عودها يحملها وانا باكلها بالليل 😂 وبقول يلا خليهن يتدللو من ابوهن 😁

العضوة: 657905 , 6 years ago

@user-688499 اللهم آمين ي رب 🌹 منورة 💜

العضوة: 701733 , 6 years ago

@user-657905 هههههههه حبيت 😂 كل شي بسوريا حلو 🤫

العضوة: 657905 , 6 years ago

@user-701733 منوره حلووووشي 💜 اي والله كلشي فيها حلوو 😍

العضوة: 728661 , 6 years ago

الله يفرجها يا رب و نرجع كلنا ع بلدنا

العضوة: 698128 , 6 years ago

@user-657905 حلوووة ياريت لو كل الناس حريصة ع بلدها مثل ابو الخير