9 years ago
  • المرحلة الثالثة (الأشهر 9,8,7)
السلآم عليكم أخواتي الحوامل ، حبيت أنزل لكم فهذا الموضوع تجربي في التسوق للمولود الجديد 👶🏼🛍 وطبعا كل وحدة لها تجربتها ، فحبيت تستفيدوا من اللي بطرحه لكم ، خصوصاً انه أغلب الحوامل دايماً تفكيرهم من وين اشتري ؟ وشو احتاج ؟ وكم العدد ؟ ووو غيرها من الأسئلة ، بالنسبة لي خذيت الأشياء الأساسية وبحط قائمتي لكم 💝 وأتمنى الاستفادة 💛

18 تعليقات

العضوة: 41797 , 9 years ago

أولاً / مستلزمات البيبي من المحلات : 1. عدد 5 افرولات مقاس newborn 2. عدد 5-6 افرولات مقاس ( 0-3 ) و ( الأفضل اللي مسكرة الرجلين ، سواءاً صيف أو شتاء لأن البيبي أول ما ينولد محتاج فترة لحتى يتعود على درجة حرارة الجو ) 3. بربتوزات داخلية بيضاء مقاس newborn و (0-3) عدد من 7-10 ( لأنك بتحتاجي تغيريها له أكثر من مرة في اليوم ) 4. بربتوزات داخلية ملونة بكم وبنص كم مقاس newborn و (0-3)

العضوة: 41797 , 9 years ago

5. مهادات عدد 3-4 ( اختاري الألوان اللي تتناسب مع ألوان الأفرولات اللي اخترتيها ، أو أبيض يتناسب مع كل الألوان ) 6. شرابات عدد 6-7 نوّعي مقاساتها من newborn و (0-3) 7. قبعات الرأس ( هذي بعد اختاري على ألوان الأفرولات شي مناسب ، وبعض الأفرولات أساساً تكون معاها طقم قبعة وشرابات ) 8. مدس عدد 2 ( يناسب الطلعات ) 9. مجموعة فوط حجم صغير تستخدميها لتنظيف البيبي بعد تغيير الحفاظ ( تحصلينها مجموعة مع بعض ) + فوطة كبيرة للاستحمام 10. شنطة عدد 2 ( تاخذين فيها أغراض البيبي لما تروحين المستشفى للولادة ، وعقب تستخدمينها للطلعات والزيارات ) 11. سرير صغير للاستقبال

العضوة: 41797 , 9 years ago

ثانياً / مستلزمات البيبي من الصيدلية : 1. حفاظات ( أفضل نوع حسب اللي سمعت بامبرز ، بتحصلي نوعين ، الأفضل للـ newborn اللي كيسه أبيض مكتوب عليه عناية مميزة ، أما للأشهر اللي بعد اشتري اللي كيسه أخضر مكتوب عليه جفاف وحيوية ) 2. حليب صناعي ( حتى لو كنتِ مقررة ترضعين طفلك رضاعة طبيعية بس الأفضل تحطي حليب احتياط في شنطة المستشفى ، لأن الأم ممكن تعاني في البداية من بعض مشاكل الرضاعة فما تقدر ترضع طبيعي لحتى تتعود ، أنا اخترت نوع اسمه Ronalac رونالاك وهو مخصص لحديثي الولادة وخذيته حسب مشورة الصيدلاني )

العضوة: 41797 , 9 years ago

3. كلينكس مرطب ( جونسون ) 4. مجموعة استحمام ( شامبو ، سائل استحمام ، كريم مرطب ، باودر للجسم، زيت للجسم ، كريم لحساسية الحفاظ ) والأفضل بالنسبة لي مجموعة seba med سيباميد 5. زيت زيتون + فازلين ( جونسون ) 6. مقص أظافر 7. مشط نوعين ( مشط بأسنان عادية و بروش ناعم ) 8. زجاجات حليب عدد 2 ( وحدة صغيرة 80 مل ، والثانية أكبر 200 مل والأفضل نوع اسمه Pigeon ) 9. بروش لتنظيف زجاجة الحليب 10. مقياس حرارة 11. ابريق كهربائي لتسخين الماء 12. ترمس صغيرة لحفظ الماء الساخن بعد تسخينه ( تناسب الطلعات )

العضوة: 23036 , 9 years ago

شكرا يعطيك العافيه في اشيا كثير كنت ناسيتها ذكرتيني💞💞

العضوة: 41797 , 9 years ago

ثالثاً / أثاث البيبي : 1. سرير نوم للغرفة ( أنا اخترت سرير مقاس 80 في 140 يناسب طفلي لخمس سنوات ) 2. دولاب ملابس ( اخترت الدولاب مع السرير طقم ليناسب شكل الغرفة ، الدولاب بقسمين ، قسم لتعليق الملابس وقسم رفوف للأغراض الثانية )

العضوة: 41797 , 9 years ago

@user-23036 الله يعافيك حبيبتي أم شوق ، تسلمين على مرورك 💝😘

العضوة: 41797 , 9 years ago

هذي كل الأغراض اللي اشتريتها ، وربي يتمم لي حملي والجميع على خير يارب ❤ ونفرح بشوفة الضنا بخير وعافية اذا نسيت شي منكم العذر 💝 وان شاء الله بنزل موضوع ثاني لمقاضي الأم في فترة الولادة والنفاس 🌹

العضوة: 24953 , 9 years ago

@user-41797 يعطيكي العوافي ربي❤ مزبوط في كثير صبايا بحتاجو لهيك موضوع.. كثير بسألن🌸 الله يتمم للجميع ع خير

العضوة: 23036 , 9 years ago

@user-41797 انا فكرت اشتري للبيبي اول لانه اهم وشنطه ثانيه تكون لي وخصوصا اذا رحت للمستشفى

العضوة: 41797 , 9 years ago

الله يعافيك ي قلبي ، ان شاء الله يستفيدن ، آميين ي رب 😘@user-24953

العضوة: 41797 , 9 years ago

@user-23036 أقترح عليكِ تجهزي شنطة البيبي وفيها : 1. عدد 2 أفرولات newborn 2. عدد 3 بربتوزات بيضاء 3. مهاد واحد 4. حليب + زجاجة حليب صغيرة 5. فوطة صغيرة 6. حفايظ 7. سائل استحمام وشامبو 8. شرابات عدد 2 9. قبعات عدد 2 وتجهزي شنطة ثانية لك بعد فيها مستلزماتك اللي بتحتاجيها ولا تنسي كريم للرضاعة لأن أحيانا الحلمة يصير لها تشققات فتحتاجي كريم + شرائح قطن خاصة تنحط على الستيان تحمي من تسرب الحليب.

العضوة: 23036 , 9 years ago

ايش افضل فوط وقت الولاده اي نوع اختار لي تكون ماتحسس للخياطه

العضوة: 41797 , 9 years ago

@user-23036 أنا بالنسبة لي اللي يناسبني ( كوتيكس ) ناعمة ومريحة وما تسرّب ، بعكس أولويز تسبب حساسية للبشرة. والانواع الثانية ما جربتها ، جربت فام وحسيته ما مريح ابدا ، كثير خشن

العضوة: 51565 , 9 years ago

مشكورة تشرين .. موضوعك في المفضله 🌹