دخلت على غرفتي وبدي أعيش جو المخدوعين في الحب..فتحت اليسا يا مرايتي..ولبست بنطلوني المنقط واكلت علبتين شوكلاتة وخمس تفاحات ورحت بسابع نومة😂 وكالعادة الساعة سبعة الصبح صحيت على صوت امي..عاملة استنفار..والا الدار قايمة قاعدة...فش اشي بمحلو...قال شووو؟؟؟ أمي بدها تستغل الشمسات وتشمس الدار وتعزلها...حتى اخوي يزن ناشرته على البرندة😂 بعدني بدي افتح ثمي واقول صباح الخير...لقيتها محملتني سجادة المطبخ.. _ركاض روحي انشريها على السطح كلها مي..خليها تلحق تنشف.. _طيب ماتخلي يزن يطلعها؟؟ليش انا يعني؟ _ثقيلة عليه...بقدرشةيحملها...هس ظهره بينقصع... نظرت نظرة سريعة على حالتي😵..بنطلوني بشبه بلاطين الصعايدة الي بلبسوهم تحت الجلابية وبسموه (كلسون)😂😂 وانا رافعته لعند صدري وبلوزتي الصوف العزيزة علي بتوسع امي ويزن معي كمان😂 وصاحية من النوم كأنه حدا شامطني بوكس مورم عيوني....شو هالمنظر إلي بدي اطلع فيه عالسطح؟؟ بلكي صادفته للشب الحلو على الدرج!! بس والله ما انا مغيرة...الي اسبوع بتزبط وبراقب وما شفته..هس يعني ب هالخمس دقايق بدو يطل؟؟ لا..لا مستحيل..اطلعي يا لبنى ولا يهمك... وعتلت السجادة على ظهري وعالسريع مريت من جنب شقته...ووصلت السطح...بعدني بفكر وين بدي انشر السجادة...سمعت صوت جاي عالسطح😱😱 يا حزركم مين!!!يا حظي المتنيل ستين نيلة مين!!! اكيد يعني لبنى وحظها الزفت..بدو يطلع مين!!!...الشب...الجار الانيق...فارس احلامي...الي شكلو رح يظل باحلامي اذا شافني هيك... عبطت السجادة ولفيت ورا خزان المي...وقلبي بدو يطلع من ثمي...من جهة بدي اشوفه..ومن جهة بديش يشوفني😂 سبحان الي خلقوو...انا بطلع جنبو ضرغام...وظليت صافنة فيه...والا هو جاي وبقرب مني...😱😱 اخ يمااا...وين اروح؟؟أطلع وأرمي حالي بخزان المي!!! ازت حالي عن السطح!! ألفلف حالي بسجادة المطبخ واختفي!!! _عفوا...لو سمحتي!! 😳😳😳😳😳😳😳 انا؟؟ولو سمحتي؟؟...لازم مسكتني ورميتني عن الطابق الثالث...انا وجه وحدة تقوللها لو سمحتي!! وكانت اول كلمة بحكيلي اياها...يماااااااا محلا صوته...ومشنع منظري😂😂 _هلوووووو.....يا أخت كلمة اخت خلتني اصحى....كل الي عشته بأفكاري من اسبوع وجاي تقول يا اخت😡...كان جاي عبالي امسك ايده واظل أعض واطلع غل هالاسبوع..... _نعم....تفضل _بس لو سمحتي بدي اشوف خزان المي...وأزبطه....لو بتزيحي شوي!! طبعا....طبعا.....شو في اشي بمنظري يجذبه!!! والله بعد هالشوفة لو استعنت بجويل شخصيا...ما رح تقدر تغير نظرته الاولية الي😭😭 وبعدت على جنب......ورميت السجادة على الارض وركضت على البيت.....كنت ناوية اركض وارمي حالي على تختي...واعمل مثل المسلسلات....بس امي استقبلتني بسلة الغسيل😭😭😭 ********** آخ منك يمااا...بنتك بتعاني وانتي كل همك الغسيلات!!😭😭 بس لما قعدت مع حالي وفكرت ودققت...وقارنت...استنتجت انو هاظ هو عذاب الحب الي بقولوله😂...يعني انا على الطريق الصحيح...وبأول خطوات،😍 وبما انه أمنت انه خلص ساكن ومستقر فوقنا ...يعني رح يبلش مشوارنا😍😍 مسكت دفتر مذكراتي..او خرابيشي😁..وجيت أكتب واعبر عن مشاعيري....طيب شو اكتب؟؟؟!!!😖 عزاااا😱صحيح شو اسموووو؟؟....على الاقل لحتى أظل اكتب اول حرف من اسمه على كل اشي قدامي😁😁 وكيف بدي تعرفي اسمه يا لبنى يا عبقرية!!!! حكيت فش غيرها..ما الي الا أمي😍...طلعت لعندها لقيتها ماسكة صنية وعليها رز..قاعدة بتنقي بالرزات(هو ظل حدا ينقي رز يا ست الكل)😂....بس عاد امي بتعرفش تقعد وتهدى لازم تشتغل😁 _تشربي شاي يما؟؟ _من متى هالحنية طبت عليكي!!!لا بديش.. قربت عليها شوي..شوي..احم..احم... _يماا...صحيح من زمان ما بعثتيني عند ام محمد..شو اخبارها؟؟ _مشتاقة الها؟؟هيها عندك تحت...روحي عندها.😒 مش هيك يا نبع الحنان...ول!!!!خذي واعطي معي...كيف بدي افتح معها موضوع لحتى اوصل لهدفي وهي بتقطم الاجابة قطم!!!😠 شكله فش فايدة من امي...ما الي الا ابو لسان يزن😍 رحت عملت سندويشة لبنة مع خيارة...واستدرجت يزن للبرندة _يزووون....توكل؟؟ _هاتي...مع انو مش من عادتك هالكرم😒 (مالهم حافظين هالجملة هو وامي،😂) _ولك يزن...لمين هالسيارة السودا الي كل يوم بتصف باب العمارة؟؟ _سيارة الشب الي بدو يسكن بالشقة فوق... (يا حبييييييبي...قربنا نوووصل،😍😍😍) _ايواااا...هاظ الشب الي.....اه صحيح شو اسمه؟؟؟ جحرني بنظرة😠ولقمة لبنة بثمه وقال: _وانتي شو بدك باسمووو؟؟شو خصك؟؟ حقير بعرفووو عامل حالو حشري وهو مش فاقس من البيضة.. _روح انصرف من خلقتي😒 ....تعال تعال....هات هالسندويشة خسارة فيك😠 طيب وبعدين؟؟؟؟!😓 المسا روح ابوي وعم الهدوووء بالدار....تعشى وشلت الصحون وانا واقفة عالمجلى بدي اجلي...وابوي على المغسلة بغسل..سمعته بحكي لامي: _صحيح يا ام يزن....المهندس يوسف رح يسكن هو وعيلته بالشقة مش بس لحاله.... (بتفكروا بالي بفكر فيه!!!😍...أجتني الاجابة من اخر انسان كان ممكن أتوقع يجاوبني😍😍 أجت منك يا بابا يا وحش😂😂😂 لا اراديا لقيت حالي كاتبة(y) (y) ....بحبات الزيتون الي ظلو من ورا ابوي😂😂 يوسف😍...وامه كمان؟؟....صعبت مهمتك يا لولوووو ********** ... يتبع