السلام عليكم و رحمته و بركاته كيفكم و وش اخباركم ، قررت هاللحظه اني انزل كل شي بخاطري لكم تقرونه و تستفيدون و تفيدونني اولا و اخيرا ، بعيداً عن الحمل و تعب الحمل و هم الحمل و ثقل الحمل وهم البيت و الاطفال و الزوج و الاهل و زعل الاصدقاء و الاقارب و العلاقات الغير منتهيه اللي تدوخ رأس الواحد انتِ وينك ؟ ليه مهمله نفسك ما اتكلم عن الشكل و الشعر و الجسم و الدايت و ...الخ اتكلم عن ذاتك روحك اشيائك الداخليه قلبك مشاعرك احاسيسك انتِ مُبعثره من زمان صار لك باع ما انتبهتي لنفسك ابيك تخصصين لك وقت اي ساعه بالنهار او بالليل ساعه كامله 60 دقيقه لك لحالك ان طالت كان بها ان ما طالت فهي تكفي و تزود لك مع ذاتك تكلمي عن اي شي مضايقك في نهارك ع ورقه لو كان برموز ما تبين احد يقراها و يفهمها غيرك اكتبيها ، دوني اي غلطه كانت بحقك من شخص عزيز او حبيب او قريب او بعيد عشان تتكلمين فيها مع نفسك في ذيك الساعه اللي خصصتيها لك زوجك ذب عليك كلمه ما اعجبتك اجرحتك لا تناقشينه ع طول فيها دونيها و ناقشي نفسك بساعتك المخصصه هل كان له داعي يقول هالكلمه هل اثرت علي و لأي مدى راح يبقى اثرها ليش خليت له فرصه يقولها لي اذا اقتنعتي انه وجب النقاش بها معه ناقشيه فيها بخيالك ارسمي الحوار عشان تتجنبين الخطاء والحرج ان كانت ما تستاهل عفى الله عن ما سلف وطبطبي ع كتفك و قولي انا قويه و لله فعلتها و شوفي المردود الالهي لك ع هالغفران سوي كل شي بنيه الله و ابشري ، و كرري هالساعه يومياً شوفس كيف راح تفرق حياتك عن قبل شوفي الاثر النفسي اللي بينطبع عليك و بتلاحظينه و بيلاحظونه اللي حولك ، لا يمر يوم بدون ساعتك و ان مر غداً اجمل و قريب اكملي تدوينك و ناقشي نفسك غدا ، اشكري نفسك ع الاشياء اللي سويتيها و ما احد انتبه لها غيرك اليوم غسلت البيت بسرعه و سويت العشاء و اكلت اطفالي قبل يجي زوجي من الدوام كوني شاكره لذاتك حتى تعطيك ذاتك طاقه التقدير يبدأ من الداخل قدري نفسك و اشكري الله ع هالساعه لانه لولا تيسير الله لما حصلت هذه الفرصه ، لا تتعذري بعدم وجود وقت الكل مشغول و لكن عند الحاجه تتأجل الاشغال اجلي اشغالك لساعتك و لا تستحقريها جربيها اسبوع و انظري لحالك كيف ستتحسنين مع الوقت من العصبيه و النرفزه و الخطاء الغير مقصود و التراكمات اللي ع كتفك و .... الخ ، خوذي كلماتي ع محمل الجد و نفذي ما اقول و سترين الفرق بإذن الله كوني دوماً شاكره لله ثم لنفسك و قدري ذاتك و ارفعي من شأن نفسك خاطبي نفسك بصوتٍ عالي عند الانجاز و اشكريها ، " كفو علي ، و ربي اني بطله ، يا سلام سلم علي ، يا ناس ما فيه مثلي .... الخ " لا تخجلي فهذا من حق نفسك عليك