احساس كتير غريب وقت بتخيل بنتي بعد كم يوم رح تكون بحضني.
عجب كيف رح نعيش نحن التلاتة سوا؟ كيف رح اقدر فرق بينها وبين جوزي و شغل البيت و بنفس الوقت اهتم بحالي؟
كيف رح يكون شكلي بعد الولادة؟ كيف رح اقدر حبها و حب ابوها بنفس الوقت وكيف رح يكون شعوري اذا جبت طفل غيرها؟ شلون رح اقدر حب كل هدول؟ عجب رح اظلم حدا منون؟ رح فضل حدا عن التاني؟ شو هو شعور الأمومة الحقيقي؟ عنجد منقدر نضحي بكل شي كرمال اطفالنا؟
في كتييييير أسئلة عّم تدور برأسي، يمكن لانو هاد اول حمل الي ويمكن لانو موعد الولادة قرب، مابعرف!! بس كتير خايفة ما اعدل بين جوزي و بنتي و اهلي و اخواتي .. بداية حملي و لبين ما دخلت الشهر التاسع كنت كتير مبسوطة و متشوقة شوف بنتي ولحد الان ماني مصدقة ايمت اولد وشوفها بحضني بس بخاف اظلم حدا من الي بحبون اذا حبيت بنتي اكتر.. شعور مافيني أوصلوه ويمكن مو كل وحدة عّم تقرا تفهم قصدي صح .. بس عنجد الأمومة على قد مو هي شي حلو على قد ما بتخوف كمان.. مسؤولية .. حب .. حنان .. عطاء .. تربية .. كل شي انتي !! هالشي بيخوف
في حدا منكون متلي ولا بس انا هيك؟
كتير حابة شوف بنتي و أحضنها و شمها، بس وقت فكر بالمستقبل بخاف..
وقت تكبر و تصير تروح عالحضانة و الروضة و المدرسة و يصير عندها رفقة، كيف بدّي أحميها ومين رح يفهم عليها متل ما انا بفهم عليها؟ كيف رح يكون تفكيرها؟ شلون رح نكون انا وياها؟ متل اي ام و بنتها ولا متل الأصدقاء؟
كيف رح يكون شعرها؟ رح تخليني مشطلها ياه ولا رح تمشطوا لحالها؟
بتذكر موقف صار معي، انا وامي اتخانقنا و وقتها كنت غشيمة و رفعت صوتي على امي وامي قالتلي بكرا بس بنتك ترفع صوتها عليكي رح تندمي على هي اللحظة، هلق وقبل ما اشوف بنتي عّم أندم لاني رفعت صوتي على امي و صار الف مرة عّم اطلب منها تسامحني وهي هلق مو زعلانة بس انا ضميري عم يعذبني انو شلون كنت غشيمة و رفعت صوتي على امي !! بخاف يجي يوم وبنتي تعيط علي و بعدين هي كمان تندم متلي !!
آسفة طولت عليكون بس كنت بحاجة لأحكي شوي و فضفض عن الشي الي عّم حس فيه ...!
العضوة: 16026 , 9 years ago
خلها على الله ياقلبي وسبحان الله كيف توافقين بتقدري توافقي بين بنتك وزوجك وبيتك ونفسك في البدايه بصعوبه بس بعدين بتتعودي صح ماراح ترجعي مثل قبل فاضيه لنفسك لا بتنشغلي وتتعبي شوي بس بتتعودي وتتاقلمي وربك يعين انا عندي طفلين وحامل بالثالث ومعطيه بيتي وزوجي وعيالي الاولويه وشوي مقصره بحق نفسي اهتم شهر وابطل شهرين لكن ربك يعينالعضوة: 38805 , 9 years ago
@user-28979 بجوز ما تصدقي بس عم حس بنفس الشئ تماما.. كتير متحمسة وخايفة بنفس الوقت... خايفة من المسؤلية.. بقعد فكر وقول لحالي بلكي ما كنت قد المسؤولية? بلكي ما عرفت ربيها? بلكي شي يوم ما انتبهت عليها وصرلا شي ? بلكي اهتميت فيها زيادة على حساب بيتي وجوزي وحالي? بلكي دار عليي الزمن وما قدرت امنلا حياة منيحة? والف بلكي وبلكي بيجو ببالي كل يوم وكل ساعةالعضوة: 38805 , 9 years ago
@user-28979 كل ما أحكي لحدا مخاوفي هي بيتضحك وبيقلي حاجة جنان ولا تفكري كل هل قد وعيشي كل يوم بيومو بس ما حدا عم يفهم عليي ولا شو حاسة.. هلق لما قريت حكيك كثير ارتحت وحسيت انو مخاوفي هي طبيعية وإني مو لحالي حبيبتي الله يقدرنا نكون قد هالمسؤولية ّ... ما بقدر قلك غير هيك .. تحياتي الكالعضوة: 28979 , 9 years ago
@user-38805 انا كمان كان عندي خوف اني احكي و بصراحة هي اول مرة عّم احكي فيها عن شعوري .. رغم اني كتير مبسوطة و متشوقة بس خايفة كتير .. الله يعينا و يسهل علينا و يقدرنا على انو نأمن حياتون و نربيون صح ياربالعضوة: 38805 , 9 years ago
@user-28979 أمين يارب .. وعلى فكرة انا ميتة رعبة من الولادة😱😱😱العضوة: 28979 , 9 years ago
@user-16026 الله يسهل عليكي حبيبتي .. الأمومة كتير صعبة وللهالعضوة: 28979 , 9 years ago
@user-38805 وانا كتير خايفة حبيبتي .. كانو انتي من سوريا؟العضوة: 36766 , 9 years ago
الأمومه صعبه والتربيه صعبه وكل م بيكبرو بتشيلي همهم اكثر ،، بس على رغم صعوبتها هي حلووه بكل شي فيها انا عندي بنوته كنت خايفه كيف بحبها وكيف بربيها بس الحمد لله كل شي تيسر كل شي عدى بسرعه صار عمرها ٤سنوات اححن بنت ف الدنيا لما تصير مشكله بيني وبين ابوها تروح تخاصم ابوها ،لما اقطع البصله وتدمع عيوني تجيب منديل وتمسحلي دمعتي تقولي من زعلك ي ماما ،،اححلى شي بالدنيا الضنى الله يخليها لي ياررب ويخليلكم حبايبكم ويرزق كل محروم ياررب ،،ودحين حامل صرت م افكرر الا انه يارب يجي بالسلامه ويسهلي 🌸العضوة: 28979 , 9 years ago
@user-36766 الله يخليلك ياها حبيبتي و انشاءالله مابتشوفي فيها مكروه يارب🙏🏻 معك حق الامومة شي كتير حلو وانا بوافقك بهالشي، بس شعور كتير بيخوف لانو لسى ماجربت عيش هي اللحظات .. اميين يارب الله يطعم كل مشتهي وما يحرم حدا من هالنعمة ياربالعضوة: 38805 , 9 years ago
@user-28979 اي من الشام حبيبتيالعضوة: 28979 , 9 years ago
@user-38805 اهلًا وسهلا فيكي حبيبتي وانا من عفرين/حلب