السلام عليكم .. الحمد لله ولدت قبل اسبوع بعمليه قيصريه كنت تعبانه وتو صحصحت وخف التعب، تاريخ دورتي كان ١ من شهر ١٠ .. اما قصة ولادتي فهي .. كان عندي موعد عند الدكتورة ولما دخلت عليها سألتني عن الحركه قلت صايره قليله مو مثل قبل احياناً مره وحده باليوم وراحت سوت لي تخطيط وكان كويس بس بالاخير نزل نبض الجنين، فراحت وقاست الرحم لقته فاتح واحد ونص وكتبت لي تنويم وتنومت وكانوا كل شوي يسوون تخطيط لنبض الجنين ويوم الثلاثاء جتني دكتوره اخصائيه وقالت النبض ممتاز بس لازم تولدين علشان الحركه قليله فقررت علي تحميلتين وحده الصبح وحده العصر قاست الرحم لقت فاتح واحد يعني النص رجع وسكر ، التحميله الاولى عادي مافيه طلق بعد الثانيه زاد الم الطلق بس كان بارد جداً وقاست لي دكتورة ثانيه لقته فاتح ٣ ونص قالت ان شاء الله مايجي العشاء الا وانتي بكشك الولادة لكن ماصار شيء ويوم الاربعاء حطوا لي تحميله ثالثه ونفس الالم ماتغير ، جتني نفس الدكتورة الخميس الصبح وقالت خلاص مافيه تحميله زيادة عقب الثلاث راح احولك على استشاري ، جاني الاستشاري يوم الجمعه قال راح انتظر عليك اليوم كامل واذا مافيه طلق راح احط لك تحميله رابعه يوم السبت الصبح وتحميله خامسه مغرب السبت واذا ماحصل طلق راح نتناقش بالعمليه يوم الاحد ، ومن عصر الجمعه زاد الم طهري قوه ويوم جت الساعه ١٠ بالليل من يوم الجمعه بدا معي الطلق وكل ماله يزود ناديت الدكتورة جت وقاست الرحم لقت فاتح ٢ وقبل كان فاتح ثلاث ونص يوم الثلاثاء يعني سكر ١ ونص ، تحطمت وجلست ابكي واتألم من الطلق حاولت اقوم امشي شوي وجلست اكل رطب وتحملت الالم لمين جت الساعه ١ ناديت الدكتورة وجت قاست قالت فاتح ٣ وجلست انتظر الى الساعه ٨ الصبح من يوم السبت بعده صار ينزل علي المويه والدم وجت الدكتورة ولقت فاتح ٤ وعلى طول ودوني كشك الولادة ، وجلست بالكشك وانا اتألم واموت من الالم واشوف بجهاز التخطيط الطلق كل ماله يزود ونبض بنتي ينقص اذا زاد الطلق وتجي الدكتورة الساعه ١٢ تقيس قالت فاتح ٦ ويخلوني بالكشك وانا قاعده اموت من الالم وحلست استفرغ مع دوخه لمين الساعه ٣ العصر وتجي تقيس قالت فاتح ٩ والدكتورة تشوف النبض ينزل لما الطلق يزود بعده قايت لقت الرحم فاتح ١٠ وتجلس تدخل اصابعها وتقولي ادفعي وانا ادفع بعدين قامت واتصلت على استشاري وجلست اتكلمه حسيت انه فيه شيء مو كويس ويجي الاستشاري ويقيس بعدين قعد يضغط على بطني وادفه بيدي ويجلس يخانقني كان يبي ينزل الجنين للحوض وكان يصغط بقوه على بطني وانا ماتحملت وبعدته عني قال للدكتورة اتركيها ياعه واذا مانزلت الحوض ندخلها غرفة العمليات ، يوم جت الساعه ٤ وشوي دخلوني غرفة العمليات خدروني تخدير كامل ولدت والحمد لله وجبت احلى بنوته الساعه ٥ وربع ، والحمد لله صح تألمت وعانيت وتعبت وتعبوني بالطلق الصناعي لكن كل شيء بأجره، طلعوني على غرفة الافاقه ثم التنويم لما صحيت جلست ابكي تذكرت اللي سووه فيني وقد ايش عانيت ، كنت ادعي كثير والحمد لله ، وعقبالكم بالولادة الطبيعيه السهله الميسره.