العضوة: 694206 , 6 years ago

بروفايلو لخطيبا خلينا نشوف شكلو و مواليدو و دراستو بنت المحظوظة ….. قلبي ،قلبي،رح يوقف ،ليكي ما احلاه لك هي بشعة ما بتنشاف ، لك على شو خطبا ،و بيشتغل بقطر كمان يعني رح تسافر لعنده…امي …انا بدي انخطب .. شو بعملك يعني ،بسط فيكي بالسوق و بقلن قرب و شوف ،عنا عروس للجازة …. لا لا انا لازم انفض حالي ،اذا بضل هيك ،كل رفقاتي رح ينخطبو و يتزوجو و انا بعدني قاعدة ،انا من بكرا بدي بلش دايت حارق خارق و روح اعملي ماسكات لبشرتي و قص شعري و اصبغه و لازم على عرس بنت خالتي فاتن اطلع بعريس مريش …. الهي يسمع منك و يجي مفتح العينين و معمي القلب و زوجك ورا بنت خالتك فاتن بشهرين ….. بلشت كثف دوامي بالنادي و بالاضافة لدايت قاسي و صرت داوم عند خبيرة تجميل لتعملي ماسكات لبشرتي و لشعري و نزلت على السوق غيرت ستايل لبسي و عملت عملية تجميل لانفي ،يعني بعد شهرين، صرت انسانة تانية ،و حتى مين ما شافني ما كان يعرفني ،يعني وصلت على عرس بنت خالتي فاتن و كنت متل الاميرة و كنت مصممة انو اطلع بعريس حتى و لو كان هالعريس موجود ببلاد الواق الواق و رحت على العرس و انا حاطة هديك الحسبة على فستاني و شعري و مكياجي حتى امي قلتلي اذا ما رح تطلعي بعريس من هالعرس بدي شغلك شطافة ادراج، لترجعيلي المصاري يلي دفعتن عليكي بهالعرس ،لك العروس بذاتها ما دفعت يلي انا دفعتو على حالي ،لهيك ما قعدت ابدا بالعرس و انا نازلة هز و رقص ،ما تركت غنية تفلت من ايدي الا و رقصت و دبكت عليها بس دخيل الله شوفوني انا اديش حلوة و بعرف ارقص ، و وين اسمع انو في مرة عندا شباب على وجه خطبة و جازة ،روح و ارقص جنبا لالفتلا نظرا لانو ما معي وقت ،لازم لحق رفيقتي هبة و انخطب بعدا ، بلكي بجاكرا و بتزوج قبلها ،و لحمدلله كل تعبي ما راح على الفاضي و اخيرا وحدة شافتني و عجبتا و راحت سالت امي عني و امي طارت من الفرحة و مسكت فيها بايديا و اسنانا و ما فلتتا قبل ما تعطيا عنوان بيتنا و موعد تاني يوم الساعة 5…..

العضوة: 694206 , 6 years ago

صارت الساعة 5و اجو اهلو للعريس المنتظر و اجت اختو و مرة ابوه بس لانو امو متوفية و طلعت قعدت معن و انا كلي خجل و حياء و بلشو يحكو عن مواصفات العريس يقبر قلبي و انا عملت حالي ما كتير مهتمة و قمت على المطبخ و لزقت ادني على باب المطبخ لاسمع شو بدو يقولو عنو و طلع العريس اسمو فادي و عمره 32سنة و مقيم بدبيو وضعه المادي كتير منيح و بيشتغل مدير قسم بمول و بعدا نادت علي امي يلي كانت ما مصدقة انو و اخيرا بدا تزوجني ،طلعت من المطبخ و قلتلا اي مامي ،قلتلي حياتي تعي شوفي صورتو لفادي ،مسكت موبايل اختو لشوف صورتو و ولي على حالي ما احلاه  معقول هيدا بدو يصير زوجي و ولله صبرتي يا لولو و نلتي ،انشالله يا رب اعجبو انا كمان ،قلتلا اي مشالله الله يحميه جذاب و رجعت قعدت جنب امي و كفت حديثها خالتو بانو العريس وضعو جاهز و ما بدنا نطول كتير بالخطبة و انا انبسطت كتير يعني رح اتزوج قبل رفيقتي هبة المكيودة و سافر قبلا، و قلتلنا انو بدنا صورتا للعروس لمى حتى نفرجيها لفادي و بعدين انشالله منتفق على المهر و تفاصيل العرس …..   هديك الليلة ما نمت من فرحتي و انا ادعي لربي يا رب اعجبو و يرجعو اهلو مرة تانية و بعد 4ايام من الدعاء و الصلاة ، دقولناا ......?

العضوة: 694206 , 6 years ago

يرجعو اهلو مرة تانية و بعد 4ايام من الدعاء و الصلاة ، دقولنا الجماعة و اخدو موعد مننا حتى يجو و نتفق على المهر و نحدد العرس، و بلشت زلغط من فرحتي و صرت نط من كنباية لكنباية انا و عم ارقص و غني هتجوز هتجوز و امي لاحقتني بالقشاطة و تقلي نزلي الله يكسر رجليكي لسا من 5ايام نظفتو لطقم الكنب، و اخيرا اجو واتفقنا على موعد العرس بعد شهرين و بكون انا اتجهزت و زبطت اوراق سفري و اعطوني رقم موبايله لفادي و حسابه على الفيسبوك حتى نتواصل مع بعض هالفترة و طبعا البابا سأل عنو لفادي و عن عيلته بحارتن بس ما حدا كان كتير بيعرفن لانو فادي الو 10 سنين تارك البلد و قاعد بدبي و ما اجى حتى زيارة لهون و ابوه و مرة ابوه عن جديد نقلو على محافظتنا بس ما مهم ،المهم اني رح اتزوج و اخيرا …‪ كنا نحكي انا و فادي بحدود النص ساعة كل يوم او يومين بس انا طار عقلي فيه و بكلامه المعسول و شخصيته الجذابة و ما كنت صدق ايمت يدقلي و اسمع صوتو و دوب دوبان و طبعا فورا حطيت على الفيس تاني يوم من قراية فاتحتي انو لمى تمت خطبتها و بلشو يباركولي رفقاتي و انا ما عبرن ابدا بحجة انو ما فاضية و عم جهز لعرسي يلي بعد شهرين و اجا موعد العرس و اخترنا صالة افراح فخمة و اخيرا لبست الفستان الابيض يلي كان رح يبقى حسرة بقلبي و رقصت على اغنية ادلع يا كايدهم و مسكت السيف و رقصت فيه و قطعت الكاتو و رقصت مع رفقاتي المكيودات و خاصة هبة يلي انصدمت بخطبتي و زواجي السريع يلي كان بلا عريس و تاني يوم سافرت لعند فادي……

العضوة: 694206 , 6 years ago

هبة يلي انصدمت بخطبتي و زواجي السريع يلي كان بلا عريس و تاني يوم سافرت لعند فادي…… وصلت على المطار و شفتو ناطرني مع انو توقعتو يكون حامل بوكيه ورد يستقبلني فيه بس كان استقبالو جاف كتير و اول ما شافني قلي اهلا و سهلا فيكي بس كانو انت بالصورة غير الواقع، قلتلو ما فهمت شو قصدك ؟ ، قلي برامج الفوتوشوب مشتغلين شغلن ،(يي العمى بقلبك على هالاستقبال)بلعت ريقي و غصيت و سكتت و ما عرفت رد عليه بشي ،طلعنا بالسيارة و اخدني على البيت فورا و انا حاولت افتح معه مواضيع كتير على الطريق بس كان يتجاوب معي ببرود ،وصلت على البيت و فتت غيرت تيابي و لبست فستان ناعم و طلعت لعندو ،اطلع فيني من تحت لفوق و رجع حط راسو بالموبايل و قلي شو بدك تتعشي ،انا تفاجات بردة فعلو الباردة و قلتلو ما بتفرق ،اي شي ،قلي معناتا انا نازل جيب اكل و برجع ،راح و رجع بعد ساعة و نص ،حكيت فين مع اهلي و ضمنتن و تفتلت شوي بالبيت يلي كان فوضى و قلت هالشي طبيعي لشب اعزب مغترب و ساكن لحاله و قررت بكرا بلش نظفه … تعشينا انا و فادي يلي كان ساكت و ما يحكي شي الا لاسئلو انا و بعد ما خلصت عشا ،قلي ضبي العشا و الحقيني انا سابقك على غرفة النوم ،ضبيت العشا و لحقتو و نام معي بس بدون اي مشاعر او لهفة و كانو هالشي كان واجب عليه و ارتاح منو ،تاني يوم فقت و ما لقيتو جنبي ،دورت على موبايلي بكل البيت حتى حكيه ،كمان ما لقيتو ،قمت غسلت وجهي و بلشت اشتغل بالبيت و انا عم اشتغل لقيت علبة كوندوم مفتوحة و مأخود منا و ما بقيان فيها الا 2، انصدمت كتير بفكرة انو فادي نايم مع وحدة قبلي بس رجعت بررت بانو هيدا ماضي و راح و هلأ انا حاضرو و ما رح يلجأ لهيك شغلات بعد ما صار عندو مرة بالبيت …

العضوة: 694206 , 6 years ago

@user-711927 تعالي حبيبتي😚

العضوة: 694206 , 6 years ago

رجع فادي على الساعة 3و كان جايب غدا معه ،و نحن عم نتغدى قلتلو كنت بدي دقلك بس ما لقيت موبايلي و دورت عليه بالبيت و ما لقيتو ،شفتلي اياه؟ ، قلي اي معي هو ،قلتلو ليش معك؟،قلي انا ما بحب مرتي تحمل موبايل ؟،قلتلو عفوا!!ما فهمت قصدك ؟ليش حتى ما احمل موبايل،قلي و ليش حتى تحمليه؟ ، وقت بدك تحكي مع اهلك بدقلن من عندي و بتحكين؟ ،قلتلو ما بس قصة اهلي ،قلي لكن قصة شو؟؟بدك تفتحي فيس و ضيعي نص وقتك عليه و تقعدي على طق حنك و تعارف مع شباب ، قلتلو ليش هيك عم تحكيني و ليش لطق حنك مع شباب؟انا مرة متزوجة و ما بحب اعمل هيك حركات ،قلي خلصتك بقا كلكن انتو النسوان نفس الطينة ،قلتلو اذا بتريد ما بسمحلك تحكي معي بهالطريقة ،انا مرتك و ليش تزوجتني اذا ما واثق فيني ،قلي انا ما بثق بحدا و تزوجتك كرمال يصير عندي عيلة و اولاد ،وقفت اكل و حملت حالي و رحت على غرفتي على امل يجي يعتذر مني على طريقة حكيه بس ما اجا ابدا و بعد ما تغدا رجع طلع من البيت ،و انا قعدت ابكي لانو ما حاسة حالي ابدا اني عروس و انصدمت كتير بفادي و ما توقعتو ابدا يعاملني هيك 

العضوة: 694206 , 6 years ago

تاني يوم الصبح حبيت انزل اتمشى شوي بالمنطقة يلي ساكنة فيها و قلت بلكي بتعرف على جيران بالبناية و بتسلى معن بعد ما فادي اخدلي موبايلي ،و بعد ما لبست ،جيت افتح الباب لانزل ،بس الباب ما انفتح معي و كان مقفل ،و عرفت انو فادي هو يلي مقفله،رجعت فتت على غرفتي و شلحت تيابي و قعدت ابكي ،انا بسجن لا بقدر اطلع و لا حتى اتواصل مع حدا من العالم الخارجي ، و ما عندي اي فكرة ليش هيك زوجي عم يعمل فيني ،نطرتو ليجي حتى حط حد لهل الشي و واجهو ،و وقت رجع على وقت الغدا ،قلتلو ليش مقفل الباب ،قلي ليش وين كنت رايحة حتى فتحتيه ؟،قلتلو كنت نازلة اتمشى شوي و اتعرف على الحارة ،قلي و كيف بدك تنزلي و ما ا خدي اذن مني ؟ ،قلتلو ماشي انا بعتذر ،غلطت بهالشي ،بس ليش مقفل الباب؟،قلي لانو ما الك طلعة لحالك وقت بدك تروحي لمحل انا باخدك ،قلتلو اوك ماشي بس ما بقا تقفلو،قلي انا هون يلي بقرر مو انت ،قلتلو انا حاسة حالي متل العبدة عندك ،اخدت موبايلي و قفلت الباب علي ،يعني لا بدك اياني احكي مع حدا و لا بدك اياني اطلع و فوت و شوف عالم و ناس، و بلشت ابكي و قلتلو ليش هيك عم تعمل معي؟، قلي انا هيك مرتي بدي اياها ،تمشي متل ما بدي و من تم ساكت و اذا ما عجبك ،في حيط اتنين تلاتة اطرقي راسك فين،طلعت فيه نظرة حقد و فتت على غرفتي لكفي بكا و مناحة و ندب على حظي ،و كالعادة تغدا و راح و رجع المسا ،  

العضوة: 694206 , 6 years ago

قلتلو اعطيني موبايلي بدي احكي مع اهلي ،قلي شو بدك تحكي معن؟،قلتلو ما معقول اقعد قلك شو بدي احكي معن ،قلي اليوم ما خرج ،لبكرا بعطيكي تحكي معن هلأ انت معصبة ،قلتلو لا اليوم بدي احكي معن ،قلي عم قلك لبكرا و روحي من وجهي هلا عم اتفرج على نشرة الاخبار ،قلتلو ما رح روح قبل ما تعطيني موبايلي ،قلي و هاي موبايلك و بلش يكسر فيه و عملو شقف صغيرة و بعدين قلي تعي خديه و احكي مع اهلك ،قويتلك اشارة التغطية فيه حتى ما يئطش معك ، رجعت فتت على غرفتي و بلشت ابكي و قضيت ايام كتيرة بعدها و انا عم ابكي ،   و بعد يومين فتت لعنده المسا و هو عم يتفرج على التلفزيون و عم يدخن ، قلتلو انت واحد مريض نفسيا و بدك علاج ،اطلع فيني و قلي لا حول و لا قوة الا بالله ، و انت وحدة ما مرباية و بدك ترباية من اول و جديد و قام نط من ورا الطاولة حتى يلقطني و انا ركضت على غرفة النوم و قفلت الباب فورا و بلش يخبط على الباب و يقلي افتحي ،وقت تحكي كلام كوني قدو و ما تهربي ،قلتلو اي و انا قدو انت واحد مريض نفسيا ،اخدت موبايلي و حبستني و ليش ما عم اعرف ،الك تار شي عنا بالعيلة ،قتلنالك حدا من عيلتك ؟،انا ما بقدر كمل معك هيك طلقني ،قلي دخول الحمام ما متل طلوعو و اذا بتجيبي سيرة الطلاق مرة تانية ،رح كسر هالباب و اتناولك و اعرف شغلي معك و بعدا رجع على غرفة القعدة بعد 3ساعات كنت نايمة وقت دق على باب الغرفة و صار ينادي لمى افتحي الباب بدي غير تيابي ،قمت من التخت و قلتلو ما رح افتحلك بلكي ضربتني ،قلي افتحي ما رايقلك هلا ، تعبان و نعسان ،قلتلو وعد شرف ،قلي وعد شرف افتحي يلا ،فتحت الباب و انا خايفة كتير ،هجم علي و مسكلي ايدي و لزقني بالخزانة و انا بلشت ابكي و صرخ ، قلي ما رح اضربك بس تاني مرة ما تعيديها و تقفلي الباب و تقولي اني مريض نفسيا ،قلتلو طيب ماشي خلص ما بقا عيدا بس اتركني، بعد عني و اخد تياب من الخزانة و مخدة من التخت و راح نام بغرفة القعدة و انا طمرت حالي بتختي و بكيت و عرفت انو الايام الجاية رح تكون اسوأ ايام حياتي …. الجزء الرابع:

العضوة: 728796 , 6 years ago

كملي

العضوة: 694206 , 6 years ago

تاني يوم المسا ،اجا و قلي اهلك دقولي كتير ،رح خليكي تحكين هلأ من موبايلي و قليلن انو موبايلك وقع بالمي بالغلط و هالفترة بتجيبي واحد ،قلتلو طيب هات لحكين ،قلي لا تعي اقعدي جنبي حتى اعرف شو بدك تقليلن ،رحت قعدت جنبو و دقيت لامي و سلمت عليا و طمنتا انو وضعي تمام و اني مبسوطة مع فادي و بعدا سالتني فادي جنبك قلتلا ايه ،قلتلي ابعدي عنو شوي بدي اقلك شغلة ،قلتلا اي ماما سامعتك الصوت منيح احكي، و نقلت الموبايل على داني التانية و وطيت الصوت بالموبايل حتى ما يسمع فادي شو بدا تقلي امي ،قلتلي ليكي اليوم كانت عنا مرة ابوه لفادي و حكتلي قصة امو لفادي بانو زوجا رجع من السفر فجأة و فات عليها على البيت و لقاها نايمة مع جارا قام قتلا لمرتو فورا ،يعني امو لفادي ما ميتة موتة ربها متل ما حكو اول مرة و كان عمرو لفادي 12سنة و شاف امو مقتولة و عرف القصة كلها و فات بحالة نفسية صعبة ،فهمتي علي بنتي يعني المغزى من كلامي فادي كيفو معك انشالله مبسوطة ، قلتلا ايه امي تمام كتير منيح و كملت حديثي مع امي و سكرت و رجعتلو الموبايل و اتاكدت انو فادي فعلا مريض نفسيا بالشك من ورا هالحادثة يلي ما نسيها لهلأ و بطل عندو ثقة بكل النسوان ، قلي شو قلتلك امك ،ضحكت و قلتلو سالتني اذا مشي الحال الا لا و فهمتني شغلات نسيت تقلي اياهن ، قلي شو هن هالشغلات ؟،قلتلو ما بينحكو ،قلي امم بطبقو معناتا ،تماما بطبقو بس انا ما ناوية طبقن يلا تصبح على خير، و قمت و رحت نمت بتختي و بعد شوي لحقني و حاول يقرب علي ، انا زتتلو القنبلة فورا بنص وجهو و سالتو مع اكام وحدة نايم قبلي ،سكت شوي و قلي ولا مع وحدة ليش عم تسالي؟،قلتلو ولاشي بس علبة الكوندوم يلي بقيان منا 2كبيتا بالزبالة من يومين ،قلي انت كيف بتفتشي باغراضي الشخصية

العضوة: 694206 , 6 years ago

@user-728796 نورتي حبيبتي

العضوة: 694206 , 6 years ago

قلتلو انا كنت عم نظف البيت و بالصدقة لقيتن يلا انا نعست و بدي نام طفي الضو انت و طالع من الغرفة ،قلي ما طالع و بعدين انا بعدني عريس و كانو شفت بخزانتك فستان بيلمع و نازل منو ليرات و سناسل اسمها بدلة رقص يمكن ، قومي لبسيا و رقصيلي ،ولا لشو هاي بطلعوها بجهاز العروس ، قلتلو شو اليوم فايق و رايق، قلي ايه لحد الان بس ما بعرف لقدام شو بصير معي ،قلتلو انت معك انفصام بالشخصية ،و فجأة انقلب حالو و مسك وجهي بايده و قلي انت ما رح تحرمي تحكي معي بهالطريقة المستفزة ؟،مسكتلو ايدو و بعدتا عني و قلتلو انا كنت عم امزح معك بس شبك عصبت ،قلي ما بقا تمزحي معي هيك مزح و قام من جنبي و راح نام بغرقة القعدة ….. تاني يوم المسا ،قعدت معو و بلشت حكي انا : فادي طلعني لشي محل ولله من اول ما جيت و انا محبوسة هون .. فادي: تعبان اليوم و ما جاي على بالي … انا: يعني بكرا منطلع … فادي: ما بوعدك حسب المزاج …. انا: و هالمزاج كيف منقدر نعدلو ؟… فادي: بس ارضى عليكي بيتعدل مزاجي… انا: ما رح ترضى علي قبل ما انا كون رضيانة و متعدل مزاجي كمان ،لانو انا روح ما بس جسم … فادي: خلص بلا كترة حكي تعي كمان فهميني شو هو الجسم و شو هي الروح… انا :انت ما بينحكى معك ابدا و انا طول نهاري محبوسة بين اربع حيطان بدي حدا احكي معو لك رح انسى كيف بيحكو …. فادي: هاي تلفزيون قدامك اذا نسيتي كيف بيحكو بس افتحيه على قناة سبيستون و هن بيرجعو بعلموكي كيف تحكي … انا: (طيب انا يلي رح خليكي ما تعرف كيف تحكي) صحي فادي كيف ماتت امك؟ طلع فيني و صفن شوي

العضوة: 694206 , 6 years ago

كيف ماتت امك؟ طلع فيني و صفن شوي فادي: مرضت بالسرطان و ماتت انا: بس انا سمعت غير هيك فادي: و شو سمعتي؟ انا: سمعت النسخة الاصلية من هالقصة فادي:و يلي هي؟؟ انا: سمعت انو ابوك قتل امك وقت لقطا هي و عم تخونو مع جاركن و لهيك انت طلعت بتشك فيني ،فكرتني متل امك.. و قبل ما كفي كلامي يلي ندمت عليه ندما شديدا شديدا ،قام علي متل التور الهايج و بلش يضربني و يقلي امي اشرف منك و من كل عيلتك ،و انا قلو بعد عني يا معقد يا مريض نفسيا ،و بعد ما حس اني انهرت من كتر الضرب ،بعد عني و تركني و طلع من البيت….يتبع الجزء الخامس:

العضوة: 728796 , 6 years ago

نورك حبيبتي

العضوة: 694206 , 6 years ago

قضيت طول الليلة و انا عم ابكي و احكي مع حاالي و قول وين كنت و وين صرت ،كنت ببيت اهلي معززة مكرمة ما بحياتي اكلت كف من اهلي ،ليش هيك صار معي ،ليش هيك طلع حظي،بالاساس ليش استعجلت على حالي و تزوجت ، كلو كرمال شو ، كرمال رفيقتي انخطبت قبلي و ليكني انا الوحيدة يلي عم اتحمل كل هالذل و ما حدا عم يتحملو عني ،يا ريت لو برجع الزمن فيني لورا لكنت ما كنت فكرت اتزوج بحياتي،كنت راسمة احلام وردية عن الزواج و طلع الواقع غير الخيال، كان كل همي ان اتزوج و البس فستان ابيض و سافر ، بس ولله انا حبيتو من قلبي شو ذنبي ادفع غلطة امو ، بس انا استفزيتو و الحق علي ما كنت لازم افتحلو هالموضوع لانو هو بكون عم يحاول ينساه، بس حتى لو استفزيتو ما كان لازم يضربني ،شو بدي اعمل هلأ……‫#‏بقلم_هلاغرابلي‬ فقت تاني يوم و و وقفت على المراية لشوف وجهي يلي كان اثار الضرب واضحة عليه و قررت ما اقعد معه ابدا و لا حكيه و ابقى بغرفتي و اطلع حطلو اكل و ارجع فوت ،و بقيت 3ايام على هالحالة بس تالت يوم المسا ، كنت نايمة بتختي وقت سمعت صوت باب البيت انفتح و فات و كان صوتو طالع عم يضحك و صوت حدا تاني معو ،قمت من تختي متل الصاروخ لشوف مين جاي لعنا،طلعت شفت فادي حاضن وحدة شقرا لابسة فستان اسود ضيق و قصير و حاطة مكياج اوفر ،اطلعت علين و قلتلو لااااااا هيك كتير جايبلي وحدة لنص البيت، انت واحد ما بتستحي على دمك ،اطلعو برا ،قلي بعدي من وجهي بدنا غرفة النوم شوي ،روحي قعدي بغرفة القعدة لبين ما نخلص ،