السلام عليكم ورحمه الله وبركاته .. كيفكم كروشات انا جربت ابره الظهر قبل سنه ونص تقريبا على بنتي وحبيت اقص قصتي عليكم وافيدكم في بعض الامور اول حاجه انا كنت بكر واول ولاده لي وكنت طبعا خايفه مرره م تتصورون الخوف اللي كنت فيه المهم المستشفى الحرس بجده طبعاً كنت اراجع فيها وعلى اخر شهري التاسع كثفت مراجعات اخاف تكون عندي ولاده وانا م اعرف يعني وش الاوجاع وكذا وفي يوم رحت وطلع رحمي مفتوح ٢ سانتي والدكتوره سالتني عن ابره الظهر ومدحتها لي وانا قلت لا اخاف تسبب شلل قالت لا ان شاءالله م يصير شي وكثير اخذوا وكذا يعني ريحتني بكلامها قعدت تحت الملاحظه ٦ ساعات وبعدها قالوا لي روحي امشي واتروشي بماء دافي عشان ينفتح الرحم وكذا خلال فتره الملاحظه جات وحد تصارخ ولاده وتقول اعطوني ابره الظهر انا جاني خووف مره وبعدها وربي هجدت ولا صياح ولا كلمه م اسمع الا صوت البيبي عاد هنا تطمنت شوي😂 وبعد م طلعت اخذني زوجي للممشى مشيت ساعه كامله وتعبت مره ويوم رجعت البيت على الساعه ١ونص جوع مو طبيعي 😂 اكلت وعبيت الكرش ونمت وبعدها الساعه اربع يقومني الم في ظهري مو طبيعي م تحملت وقمت امشي بصالتي واشرب عصير اناناس وبعدها حسيت شي نزل كل شوي اروح اغسل الله يكرمكم الا هي السداده نزلت وانا م كنت ادري وش هي المهم زوجي بعدها بساعتين قام للدوام عاد م يقدر يغيب لانه عسكري ف مجبور يداوم ويخليني لحالي اتالم😩 طلبت من اخوي يجيب امي احتياط عاد وتسليني شوي عشان م اوسوس وجات الله يسعدها وعاد انا لازم اضيفها سويت القهوى والحلى من قبل عندي وجبت الفطور وافطرنا وانا كل شوي الف يمين شمال وسوالفي مقطعه 😂😂 من الالم كل م اقول كلمه جاني نغز يمين ومره شمالي وعاد تشوفوا كيف ماسكه ظهري من الالم والمصيبه متحمله 😂 اخر شي امي قالت ي بنتي يلا انا بروح البيت الساعه ١٠ وراي غداء عاد نوديك المستشفى ع طريقنا والا تستني زوجك قلت دقيقه خلينا نحسب كم بين كل الم والثاني طلع بينهم خمس دقايق بالضبط يعني الطلق حامي وقالت امي يلا بسرعه البسي قلت لحظه خليني اخذ دش دافيء واحس بانتعاش شوي المهم وجري ع الحمام وهي تدق ع اخوي يجي ياخذنا ويوم ركبت للسياره خلاص م قدرت اتحمل عاضه ع شفايفي وكل الم اوقوى من الثاني ي سبحان الله وقول لاخوي يلا م وصلنا عاد المستشفى بينا وبينها ٢٠ دقيقه تقريبا المهم م صدقت اوصل وباقي يسجلوني وكرت عائله وكذا وجلست بالاستراحه ومعاي امي وعاد شوفوا الالم كيف ياربي ودي اصيح ودي اقول خلاص. دخلوني تكفون والمهم زوجي قريب من الدوام وجاء وامي واخوي راحوا بعد م دخلت جواء وكشفوا قالوا خمسه سانتي😱 وعاد تشوفي وجهي من الرعب يالله انتفض ماني مصدقه انه خلاص جاء الوقت الحاسم اللي خلاص بشوف بنتي فيه المهم وامي بعد م عرفت انه ولاده راحت هي واخوي وزوجي قعد عندي من الساعه ١١ ونص ل ١ وبعدين قال يلا انا بروح اقيل اريح في البيت وانتي انتبهي لنفسك واذا بغيتي شي دقي علي عاد تشوفوا دموعي كيف اربع اربع اضحك وابكي قدامه من الخوف ماني مصدقه ولا وبعد بيخليني لحالي😩💔 المهم راح وانا قعد اتالم لين افكت المويه علي الساعه ٢ وبعدها اقول المويه الحقوني افكت وركبو لي قصدره ع طول وقالوا تبين ابره الظهر والا لا عاد سوال مفاجئ ومحير م ادري اقول اي او لا والا في سستر الله يسعدها هدتني وقالت م عليك انا اخذتها ثلاث مرات وربي راحه وكذا يعني هدتني قلت خلاص طيب ويجي دكتور واستشاري معاه ويشرح لي عن ابره الظهر وعاد انا اساله اخاف تسبب شلل وخايفه ومدري ايش وهو صيح علي قالي ي اختي احنا اخبر منك وهذي م تسبب شلل ان شاءالله ويعني كان معاي بالكلام حاد وانا خفت وسمعت كلامه😂. المهم ولمن قعدوني وخلاص جاء بيركبها وانا يجيني ذاك الدفع مدري الطلق واصرررررخ. يالله م تتخيلوا قد ايش طلعت مني الصيحه وانا احاول اسكت م قدرت قالي الدكتور. ي اختي اصبري واتحملي شوي لمن ندخلها واسكت وحمدلله دخلها وعدت ع خير ويرجعوني انسدح من جديد وربي بعدها م حسيت بالم مره وارتحت نفسياً مره ونمت لي ساعه تقريبا وبعديها يصحوني يقولوا الطلق بارد ونبي نعطيك طلق صناعي لان الجنين تبرز في بطنك المهم ويعطوني الطلق وانا م احس باي الم حمدلله كل شي هان وخف بس باقي البيبي يطلع ومن الساعه ٣ بعد الطلق الصناعي اخذت لي نومه حلوه طبعاً كل شوي اقوم اشوف الوضع وكذا يعني نومي مو متواصل صح اني احس بالم بس مو ذاك الالم القوي اللي يهد الحيل وعلى الساعه ٥ ونص تقريباً جاتني دكتوره قالتلي الجنين ماهو في الحوض حاولي تدفعي طول م انتي سادحه يعني كانك تتبرزي الله يكرمك قلت طيب وقعدت ساعه وانا ادفع ومغمضه عيني وادعي واستغفر وفجاءه يتجمعوا علي يقولوا الراس طلع يعني مره وضح من تحت يلا وقت م نقولك ادفعي تدفعي اوك اقول طيب تعد لي 123😂 ادفعي وانا اشد حيلي وبعدها تقولي وقفي خلاص لمن ارجع اقولك ادفعي المهم لا الم ولاشي مغير ادفع لمن حمدلله طلعت بنوتتي يارب لك الحمد وفرحت فيهت كثثثير وعلى حظي دخلنا فتره المساء واللي كان دوره دكتور جاء خيطني ولمن خف البنج بديت احس بالم الخياطه واقوله خلاص يلا انا شاده حيلي بقوم اشوف بنتي😂😂✋🏿 شوي حطوها ع صدري وشالوها وبسرعه المهم وبعد م تخيطت حمدلله وكل شي تمام جاء زوجي وقلت شفتها قالي ايه شفتها وسالت ذي بنت فلانه واذن باذنها ومبسوط حمدلله وجابولي اكل وانا ع فطوري الصبح😂😩 افترسته كله حمدلله وبعدها نقلوني ع الجناح بالكرسي المتحرك واقول لزوجي نفسي بحليب بالشاهي دافي يالله يجيبه لي وعاد اشربه وانام نومه تعب هلاك م ادري كيف اشرح النومه ذي😩😩😩❤️❤️ المهم واقوم من النوم حتى ناسيه الساعه كم والقاها جنبي جايبينها ي لبييه 😩 ❤️ من الخوف وكذا م عرفت اشيلها وحمدلله وقت نومي واليومين اللي قضيتها بالمستشفى من بعد ابره الظهر م احس بشي ابدا حمدلله وقمت امشي واتحرك تقريبا الفجر او الصبح يعني راح البنج مو راح مره لا خف وقالولي لازم تتحركي عشان م تجيك تجلطات مدري ايش عاد المهم انها احلى ولاده بالنسبه لي وانا الان حامل بالثاني من حوامل ١٣ اكتوبر ادعولي بالتسهيل والولد الصالح يارب وعقبالكم كلكم اتمني اعيد تجربه ابره الظهر بس امي دعت اني م الحق اخذها تقول م تنفع لازم تحسين بالم الولاده😼💔 الله يعين بس اذا كان خير يارب اكتبها لي وانا كانت فيها ضرر ابعدني عنها هذا الدعاء لازم تقولوا واستخيروا قبل. تقدموا على اي قرار ونصيحه لازم مستشفى موثوق زي العسكري والحرس والدكتور شاطر وخبره غير كذا انا م اظمن صراحه ✋🏻 لاتنسي ي جميلتي ان تقولي ماشاءالله😘 اي استفسار راح ارد ان شاءالله ادعولي بالعشر الاواخر ولكم بالمثل ❤️❤️❤️