حابة اشارك قصتي بالولادة لاني كل ما اتذكر بتاثر وبصير ابكي مثل الحلم كان بدي حدا يطلع بعيوني و يقولي يا بطلة 😒😒 قصتي كالتالي : انا بكرية حملي كان طبيعي حرقة وحموضة وكل الاعراض العادية ... الدكتورة قالتلي بس تصيري اربعين اسبوع تروحي عالمستشفى للفحص وصرت اربعين اسبوع كان عندي الام ظهر شديدة بس كنت مستحملة الالم وما اشتكيت وكل شي تمام رحنا عالمستشفى انا وزوجي الساعة سبعة الصبح دخلت غرف الميلاد وتحضرت ونفسيتي تمام اخدت تحريض واخدت الابرة فوق الجافية وصرت اقرأ اذكار وقران وادعية واستغفارات وبعد ساعات طويلة الالم صار يزيد ويشتد والطلق يزيد وما في فتحة صار عندي حرارة عالية وصرت ارجف من الوجع وابكي ضليت على هالحالة لحتى اجت الدكتورة نزلتلي مية الراس وقالت منستنى لحتى يصير فتحة وهييك لحتى الساعة ١١ المسا كانت فتحة كاملة بس الولد ما نزل للحوض دخلت غرفة العمليات الدكتورة قالت منحاول نشفط الولد بالشفاط ازا ما طلع رح تولدي عملية الساعة ١١ ونص ولدت ولادة طبيعية بالشفاط والحمدالله تالمت كتير وما غدرت اصرخ من الوجع بعد ما حطيت ابني بحضني نسيت كل الدنيا دموعي على خدي بعدين صار عندي نزيف وحرارة عالية وخدروني تخدير كامل لحتى يحلو مشكلة النزيف والخياطة . صحيت من التخدير بعد اربع ساعات متل المشلولة لحالي ما في حدا حوالي ولا ابني ولا جوزي وجسمي بارد كتير ونبضات قلبي سريعة وبتوجع ناديت الممرضة قالتلي انه ولادتي كانت صعبة ابني منيح وصحتو ممتازة وجوزي رجع البيت يرتاح ضليت بدون ما اشوف ابني لحتى الساعة 11 الصبح وقلبي ملهوف بدي احمله وارضعه وانا مش حاسة بجسمي من الالام . كيف الام قوية وجبارة كيف امهاتنا استحملو مشانا نحنا نستحمل مشان ولادنا حتى ونحنا تعبانين ومنشتكي الالم منقوم نعتني ونهتم ونرضع اولادنا بكل حب يا ربي ارضى عن ابني واحميه يا رب امين تجربة بعمري ما راح انساها بس اكيد رح اكررها لانها نعمة من الله حبيت اكتب وافضفض ربي يخفف عن كل حامل حملها وعن كل والدة ربي يسههلها ولادتها ويرزقها بفرحة كبيرة امين يا رب العالمين 🤲🤲🤲