ﺍﻧﻴﻦ ﻟﺞ ﻣﻦ ﺛﻮﻝ ﻳﺜﻮﻟﺞ ﻭﻛﺒﺮ ﻳﻄﻤﺞ ﻭﺍﺧﻠﺺ ﻣﻨﺞ ﻳﺎ ﺍﺣﺠﺎﺭﻩ ﻭﻧﺎﻳﻤﻪ ﻉ ﻛﻠﺒﻲ .. ﺍﻧﻴﻦ ....... ﺍﻧﻴﻦ . ﺍﻣﻤﻤﻢ ﻫﺎﺍﺍ ﻳﻤﻪ ﻭﺍﻟﻠﻪ ﺍﻟﺒﺎﺭﺣﻪ ﺭﺟﻌﺖ ﻣﻦ ﺍﻟﺪﻭﺍﻡ ﺗﻌﺒﺎﻧﻪ ﻣﺎﺍﻛﺪﺭ .. ﺍﻱ ﺗﻌﺒﺎﻧﻪ ﻭﻧﺴﻴﺘﻲ ﺍﻟﻴﻮﻡ ﺟﻤﻌﻪ ﻭﻻﺯﻡ ﺍﻧﺮﻭﺡ ﻟـ ﺍﻡ ﺣﻤﻴﺪ " ﺍﻭﻭﻭﻩ ﻳﻮﻡ " ﻫﻢ ﺍﻡ ﺣﻤﻴﺪ ﻣﻮ ﻛﺎﻟﺖ ﻣﺎﺗﺸﻮﻑ ﺍﻟﺠﻤﻌﻪ ?.. ﺍﻱ ﻣﺘﺸﻮﻑ ﺍﻟﺠﻤﻌﻪ ﺑﺲ ﺍﺧﻠﻴﻬﺎ ﺍﺗﺴﺒﺤﺞ ﻭﺗﻘﺮﺃ ﻋﻠﻴﺞ ﺑﻠﻜﻲ ﻳﻄﻠﻊ ﻫﺬﺍ ﺍﻟﺒﻠﻪ ﻣﻨﺞ . ﻓﺪﻭﻭﻩ ﻳﻤﻪ ﻳﺎ ﺑﻠﻪ ﺍﻧﻲ ﻣﻮﻇﻔﻪ ﻭﺍﺷﺘﻐﻞ ﻭﺍﻣﻮﺭﻱ ﺗﻤﺎﻡ ﻣﻨﺎﻗﺼﻨﻲ ﺷﻲ ﺑﻌﺪ ﺷﻨﻮ ﺍﻟﺒﻠﻪ ﺍﻟﻲ ﺑﻴﻪ !.. ﻟﺞ ﺍﻧﻮﻥ ﻣﻮ ﺍﻧﺘﻲ ﺗﻌﻠﻤﻴﻨﻲ ﺍﻟﻲ ﻳﻔﻴﺪ ﻭﺍﻟﻲ ﻣﻴﺼﻴﺮ ﺍﻣﻮﺕ ﻭﻣﻨﻮ ﻳﺒﻘﺎﻟﺞ ﺍﺗﺸﻮﻓﻴﻦ ﺍﺧﻮﺍﻧﺞ ﻣﻠﺘﻬﻴﻦ ﺑﻤﺠﺎﺑﻴﺤﻬﻢ ﻭﻧﺎﺳﻴﻨﺞ ﻭﻣﻌﺘﻤﺪﻳﻦ ﻉ ﺭﺍﺗﺒﺞ ﻣﻦ ﺗﻮﻛﻌﻴﻦ ﻣﺤﺪ ﻳﺴﻨﺪﺝ ﻏﻴﺮ ﺍﻟﺮﺟﺎﻝ . - ﻛـ ﺍﻟﻌﺎﺩﻩ ﻣﺎﺍﻛﺪﺭ ﺍﺭﺩ ﻉ ﺍﻣﻲ ﻭﺍﺳﻠﻢ ﺍﻣﺮﻱ ﻟﻠﻪ ﻭﺍﻣﺸﻲ ﻭﺭﺍﻫﺎ ﻣﺜﻞ ﺍﻟﻨﻌﺠﻪ ﺍﻟﻲ ﻣﺎﺧﺬﻳﻪ ﻟـ ﺍﻟﺬﺑﺢ . ﻣﺎﺍﺩﺭﻱ ﻟﺸﻮﻛﺖ ﺍﺑﻘﻪ ﺍﺗﺤﻤﻞ ﻫﺬﺍ ﻛﻠﻪ ﻭﺍﺷﻠﻮﻥ ﺍﺧﻠﺺ ﻣﻦ ﻫﺎﻱ ﺍﻟﻮﺭﻃﻪ ﻭﺍﻧﻲ ﻛﻞ ﻳﻮﻡ ﻳﻢ ﺳﺤﺎﺭﻩ ﻭﻛﻠﻬﻦ ﺟﺬﺍﺑﺎﺕ ﻭﻣﺨﻠﺼﺎﺕ ﺭﺍﺗﺒﻲ ﻭﺍﻧﻲ ﻣﺎﺍﻛﺪﺭ ﺍﺭﻓﺾ ﻻﻥ ﺍﻣﻲ ﻣﻦ ﻛﻞ ﻋﻘﻠﻬﺎ ﻭﺣﺪﻩ ﻣﻦ ﺍﻗﺮﺍﺑﻨﺎ ﻣﺴﻮﻳﺘﻠﻲ ﺳﺤﺮ * ﻭﺑﺎﻻﺧﻴﺮ ﺍﻧﻲ ﺍﻟﺨﺴﺮﺍﻧﻪ ﻫﻢ ﺭﺍﺗﺒﻲ ﻭﻫﻢ ﻭﻗﺘﻲ ﻭﻫﻢ ﺷﺨﺼﻴﺘﻲ ﺍﻟﻲ ﻛﻞ ﻳﻮﻡ ﻣﻨﺰﻟﺘﻬﺎ ﻛﺪﺍﻡ ﺑﺎﺏ ﻭﺣﺪﻩ ﻣﺘﺨﻠﻔﻪ ﺗﺪﻋﻲ ﺍﻟﻌﻠﻢ ﻭﺍﻟﻔﻬﻢ .. ﺑﺪﻟﺖ ﻭﺍﻧﺘﻈﺮ ﺍﻧﺮﻭﺡ ﻟـ ﺍﻡ ﺣﻤﻴﺪ ﻭﺑﻌﺪ ﺣﺘﻪ ﺍﻟﻔﺸﻠﻪ ﺭﺍﺣﺖ ﻣﻦ ﻋﻨﺪﻱ ﺟﻨﺖ ﻗﺒﻞ ﺍﺳﺘﺤﻲ ﻭﺍﺿﻮﺝ ﻫﺴﻪ ﺍﺗﻌﻮﺩﺕ ﺍﺣﻀﺮ ﻧﻔﺴﻲ ﻭﺍﻧﺘﻈﺮ ﺍﻣﻲ ﺍﺗﺸﻮﻓﻠﻬﺎ ﻋﺬﺭ ﺍﺗﻜﻮﻟﻪ ﻟـ ﺍﺧﻮﺍﻧﻲ ﺣﺘﻪ ﻧﻄﻠﻊ ﺑﻬﻴﺞ ﺳﺎﻋﻪ ﻭﺍﻧﻲ ﻣﺎﻋﻨﺪﻱ ﺩﻭﺍﻡ ... ﻫﻤﻪ ﻧﺴﻮﺍﻧﻬﻢ ﺍﺗﻜﻠﻬﻢ ﻉ ﻛﻞ ﺷﻲ ﺍﺻﻼ ﺯﻭﺟﺖ ﺍﺣﻤﺪ ﺍﺻﻐﺮ ﻣﻨﻲ ﻭﻣﺨﻠﺼﻪ ﻳﻮﻣﻬﺎ ﺗﻘﻠﺪ ﻭﺗﻀﺤﻚ ﻋﻞ ﺣﺎﻟﻲ ﻭﺩﺍﺋﻤﺎ ﺍﺗﺴﻤﻌﻨﻲ ﻛﻼﻡ ﺑﺲ ﺍﻧﻲ ﺍﺗﺤﻤﻞ ﻻﻥ ﻣﺎﻋﻨﺪﻱ ﻏﻴﺮ ﺣﻞ ﻫﻮ ﺍﺳﻜﺖ ﻭﺍﺳﺘﻮﻋﺒﻬﻢ ﻛﻞ ﻭﺍﺣﺪ ﻋﻨﺪﻩ ﻋﻘﺪﻩ ﺷﻜﻞ ﻭﺍﻧﻲ ﻣﺼﻔﺎﺕ ﺍﻟﺬﻧﻮﺏ ﻣﺜﻞ ﻣﻴﻜﻮﻟﻮﻥ ... ﺍﻣﻲ ﺍﺗﺮﻳﺪ ﺍﺗﺰﻭﺟﻨﻲ ﻻﻥ ﺧﺎﻟﺘﻲ ﺳﻌﺎﺩ ﻣﻤﺘﺰﻭﺟﻪ ﻭﺧﺎﻳﻔﻪ ﺍﺳﺘﺎﺭﺙ ﺍﻟﻌﻨﻮﺳﻪ ﻣﻨﻬﺎ .. ﺗﻔﻜﻴﺮﻫﻢ ﻣﺤﺪﻭﺩ ﺟﺪﺍﺍ .. ﻋﻨﺪﻱ ﺍﺣﻼﻡ ﻭﻃﻤﻮﺡ ﻭﺍﻫﺪﺍﻑ ﺑﺲ ﻣﺎﺍﻛﺪﺭ ﺍﺣﻘﻘﻬﻢ .. ﺍﻧﻴﻦ ﻳﻠﻪ ﻣﺎﻣﺎ ﺍﻧﺮﻭﺡ ﻟـ ﺻﺪﻳﻘﺘﺞ ﺍﺗﺎﺧﺮﻧﻪ .. ﺍﻱ ﻳﻮﻡ ﺟﺎﻳﻪ .. ـ ﻃﻠﻌﻨﻪ ﺩﻧﻴﺎ ﺍﻟﻈﻬﺮ ﻭﻣﺤﺪ ﺑﺎﻟﺸﺎﺭﻉ ﺻﻴﻒ ﻭﺍﻟﺴﺎﻋﻪ ﺍﺩﻋﺶ ﻭﻧﺺ ﻭﺑﻌﺪ ﻣﺤﺴﻴﺖ ﺑﺮﻭﺣﻲ ﻣﻦ ﺍﻟﺤﺮ ﻭﺍﻟﻨﺎﺱ ﻛﻠﻬﺎ ﺑﺒﻴﻮﺗﻬﺎ ﺑﺲ ﺍﻧﻲ ﺍﻓﺘﺮ ﻭ ﺍﺭﻛﺾ ﻭﺭﺍ ﺍﻣﻲ ... ﺻﻌﺪﻧﺎ ﺑـ ﻛﻴﻪ ﺗﻮﺻﻠﻨﺎ ﻟـ ﺍﻟﺸﺎﺭﻉ ﺍﻟﻌﺎﻡ ﻫﻨﺎﻙ ﺑﻴﺖ ﺍﻡ ﺣﻤﻴﺪ ... ﺍﻭﻝ ﻣﺎﺻﻌﺪﺕ ﺍﻟﺴﻴﺎﺭﻩ ﺑﺪﺕ ﺍﺷﺘﻐﻠﺖ ﺍﻟﺘﺨﻴﻼﺕ ﺟﺎﻥ ﺍﻛﻮ ﺷﺎﺏ ﺟﺪﺍﺍ ﻭﺳﻴﻢ ﻛﺎﻋﺪ ﻣﻘﺎﺑﻴﻠﻲ ... ﻣﺎﺍﺷﻮﻑ ﺍﻻ ﺍﻟﺒﺎﺏ ﻣﺎﻝ ﻏﺮﻓﺘﻲ ﺍﻧﺪﻓﻊ ﻭﺩﺧﻞ ﻫﺬﺍ ﺍﻟﺸﺎﺏ !!... ﻣﻨﻮﻭ ! ﺍﻧﺖ ! ! ﺷﺠﺎﺑﻚ ﺍﻫﻨﺎ !! ﺻﺪﻣﻪ ﻣﻌﺎﻳﺸﺘﻬﺎ ﺑﺤﻴﺎﺗﻲ ﺍﻧﻲ ﻭﻳﻦ ﺟﻨﺖ ﺷﻠﻮﻥ ﺭﺟﻌﺖ ﺷﻨﻮ ﺻﺎﺭ ﻫﺬﺍ ﻣﻨﻮ ﺷﻨﻮ ﻳﺮﻳﺪ ﻭﻟﻴﺶ ﺩﺧﻞ ﻏﺮﻓﺘﻲ ﺑﻬﻴﺞ ﻃﺮﻳﻘﻪ ﻭﺍﺑﺪ ﻣﻴﺤﺠﻲ ﺑﺲ ﺳﺎﻛﺖ ﻭﻳﺴﺤﺐ ﺑـ ﺍﻳﺪﻱ ﻣﺎﺍﺩﺭﻱ ﻭﻳﻦ ﻳﺮﻳﺪ ﻳﺄﺧﺬﻧﻲ ?... ﺍﻧﻴﻦ ..... ﺍﻧﻴﻦ ... ﻫﺎ ﻫﺎ ﻧﻌﻢ ﻣﺎﻣﺎ ﻭﻳﻦ ﺍﻧﻲ ?.. ﻟﺞ ﺍﻧﺰﻟﻲ ﻭﺻﻠﻨﺎ ﺷﺒﺴﺮﻋﻪ ﻧﻤﺘﻲ ﻳﺎ ﻣﻌﺰﺍﻳﻪ . ـ ﻭﻛﻔﻨﺎ ﺍﻛﺒﺎﻝ ﺑﻴﺖ ﺍﻡ ﺣﻤﻴﺪ ﺍﻟﺒﺎﺏ ﻣﻔﺘﻮﺡ ﻭﺳﺎﻋﻪ ﻧﺘﻮﺳﻞ ﺣﺘﻪ ﻳﻘﺒﻠﻮﻥ ﺍﻧﻔﻮﺕ ﻻﻥ ﺍﻟﻴﻮﻡ ﺟﻤﻌﻪ ﺍﺳﺘﺮﺍﺣﻪ ﻋﺪﻫﺎ ﻳﻨﻜﻄﻊ ﻋﺪﻫﺎ ﺍﻟﻨﻮﺭ ﺍﺳﺘﻐﻔﺮ ﺍﻟﻠﻪ ﻛﻠﻬﺎ ﻛﻼﻭﺍﺕ ﻭﺟﺬﺏ ﺑﺲ ﺷﻨﻮ ﺍﺳﻮﻱ ﺍﺫﺍ ﺍﻣﻲ ﺭﺍﺩﺕ ﺷﻲ ﺍﺗﺴﻮﻱ ﻭﺍﻧﻲ ﺑﺪﻭﻥ ﺷﻲ ﻣﺨﻠﺼﺎﻧﻪ ﻣﻦ ﻫﺎﻱ ﺍﻻﺣﻼﻡ ﺍﻟﻲ ﺍﺗﺮﺍﻓﻘﻨﻲ ﺑﻜﻞ ﻣﻜﺎﻥ . ﺩﺧﻠﻮﻧﺎ ﻟـ ﺍﻡ ﺣﻤﻴﺪ ﺑﻌﺪ ﺗﻮﺳﻞ ﻋﺒﺎﻟﻚ ﺯﻳﺎﺭﺓ ﻟـ ﺗﺮﺍﻣﺐ .. ﺩﺧﻠﻨﺎ ﺍﻛﻴﺪ ﺍﻧﻲ ﻋﺮﻑ ﺧﻮﺵ ﺭﺯﻕ ﺑﻴﻪ ﻣﺪﺭﺳﺔ ﺭﻳﺎﺿﻴﺎﺕ ﻭﺧﺼﻮﺻﻲ ﻭﻣﻤﺘﺰﻭﺟﻪ ﻭﻋﻤﺮﻱ ﺍﺛﻨﻴﻦ ﻭﺛﻼﻳﻦ ﺳﻨﻪ ﻳﻌﻨﻲ ﻧﺎﺯﻟﻪ ﻣﻦ ﺍﻟﺴﻤﻪ ﻋﻠﻴﻬﺎ ﻻﺯﻡ ﺍﺗﺴﻮﻳﻠﻲ ﺧﺼﻢ ﻫﻢ ﻻﻥ ﻫﻲ ﻣﺘﺄﻛﺪﻩ ﻣﻨﻲ ﻣﺎﺍﺗﺰﻭﺝ ﺑﻤﺠﺘﻤﻊ ﻳﻔﻜﺮ ﺍﻭﻝ ﺷﻲ ﺑﻌﻤﺮ ﺍﻟﺒﻨﻴﻪ ﻣﻦ ﻳﺨﺘﺎﺭ ﺯﻭﺟﻪ ﻟـ ﺍﺑﻨﻪ ﺣﺘﻪ ﺍﻟﺸﺎﺏ ﺍﻟﻲ ﺑﻌﻤﺮﻱ ﺍﻛﻴﺪ ﻳﺘﺰﻭﺝ ﻭﺣﺪﻩ ﺍﺻﻐﺮ ﻣﻨﻪ ﺑﻘﺮﻥ .. ﻫﺬﺍ ﻣﺠﺘﻤﻌﻨﺎ ﺍﻟﻲ ﻳﻌﺘﺒﺮﻧﻲ ﺑﻬﻴﺞ ﻋﻤﺮ ﻭﻣﻤﺘﺰﻭﺟﻪ ‏( ﻋﺎﻧﺲ ﺭﺳﻤﻲ ‏) . ﺑﺲ ﺍﻟﺸﺎﺏ ﺍﻟﻲ ﺑﻌﻤﺮﻱ ﻣﺤﺪ ﻳﺤﺠﻲ ﻋﻠﻴﻪ ﻭﺍﻣﻪ ﺗﺨﺘﺎﺭﻟﻪ ﺑﻨﺖ ﻋﻤﺮﻫﺎ ﺍﻗﻞ ﻣﻦ ﻋﻤﺮ ﺍﺑﻨﻬﺎ ﺍﻗﻞ ﺷﻲ ﺑﻌﺸﺮ ﺍﻭ ﺧﻤﺲ ﺳﻨﻮﺍﺕ .. ـ ﻫﻼ ﻭﺍﻟﻠﻪ ﺑـ ﻭﺟﻪ ﺍﻟﺨﻴﺮ ﻫﻼ ﺑـ ﺍﻧﻴﻦ . ـ ﺍﻡ ﺍﻧﻴﻦ : ﻫﻼ ﺑﻴﺞ ﻋﻴﻨﻲ ﺍﻡ ﺣﻤﻴﺪ ﺷﻮﻓﻴﻠﻲ ﺻﺮﻓﻪ ﺑـ ﺍﻧﻴﻦ ﺗﻌﺒﺘﻨﻲ ﻛﺒﺮﺕ ﻭﻣﺎﻛﻮ ﺍﻟﻬﺎ ﻧﺼﻴﺐ ﺍﺭﻳﺪ ﺍﺯﻭﺟﻬﺎ ﻗﺒﻞ ﻻ ﺍﻣﻮﺕ ﺍﺭﻳﺪ ﺍﻃﻤﺌﻦ . ﻋﻠﻴﻬﺎ ﻭﺍﻟﻠﻪ ﻳﺨﻴﺘﻲ ﺍﻟﺰﻣﻦ ﺍﻏﺒﺮ ﻭﺍﺧﺎﻑ ﻋﻠﻴﻬﺎ .. ﺍﻡ ﺣﻤﻴﺪ : ﻭﺻﻠﺘﻲ ﻋﻴﻨﻲ ﻭﺻﻠﺘﻲ ﺑﺲ ﻣﻮ ﺍﻟﻴﻮﻡ ﺑﻌﺪﻳﻦ ﺍﺳﻮﻳﻠﻬﺎ ﺷﻐﻞ ﻣﻀﺒﻮﻁ ﻫﺴﻪ ﺑﺲ ﺍﻏﺴﻠﻬﺎ ﺑﺎﻟﻄﺎﺳﻪ ﺍﻟﻤﺒﺎﺭﻛﻪ ﻭﺑﻌﺪﻳﻦ ﺍﻟﺸﻐﻞ ﺍﺗﺮﻭﺡ ﺑـ ﻟﻤﺢ ﺍﻟﺒﺼﺮ ﺍﺗﻄﻴﺮ ﻭﺗﺰﻭﺝ .. ـ ﻭﺍﻧﻲ ﺻﺎﻓﻨﻪ ﻭﺍﺳﻤﻌﻬﻦ ﻭﻛﻠﺒﻲ ﻃﻖ ﻣﻦ ﺍﻟﻘﻬﺮ ﻭﺍﻧﻮﺏ ﺍﻃﻴﺮ .... ﻣﺎﻣﺎ ﻣﺎﻣﺎ ﻓﺪﻭﻭﻭﻩ ﻣﻨﻮ ﻳﺴﻤﻌﻨﻲ .... ﺷﻨﻮ ﻫﺎﻱ ﺍﻧﻲ ﻭﻳﻦ ?.. ﻣﻨﻮ ﻫﻨﺎ ﺍﻛﻮ ﺑﺸﺮ ﻳﺴﻤﻌﻨﻲ ﻣﻤﻜﻦ ﺑﺲ ﺍﺣﺪ ﻳﺮﺩ .. ﺍﻧﻴﻦ ﺍﻧﺘﻲ ﻳﻤﻨﺎ ﺍﺗﻔﻀﻠﻲ ﺍﺗﻔﻀﻠﻲ .. ﻣﻨﻮ ﺍﻧﺘﻮﺍ ﻣﺪﺍ ﺍﺷﻮﻓﻜﻢ ?.. ﺍﻧﺘﻲ ﻭﻳﻦ ?.. ﻋﺎﺍﺍﺍﺍ ﺍﻧﻲ ﻃﺎﻳﺮﻩ ﻓﺪﻭﻭﻭﻩ ﻧﺰﻟﻮﻧﻲ ﻧﺰﻟﻮﻧﻲ ﻣﺤﺪ ﻳﺴﺎﻋﺪﻧﻲ !.. ﻓﺠﺄﺓ ﻧﺰﻝ ﻣﻲ ﻉ ﺭﺃﺳﻲ ﺻﺤﺎﻧﻲ ﻣﻦ ﺟﺪﻳﺪ ﻭﺷﻠﻮﻥ ﻭﺻﻠﺖ ﻟـ ﺣﻤﺎﻡ ﻭﺍﺷﻠﻮﻥ ﻛﻌﺪﺕ ﻭﺍﻧﺘﻈﺮ ﺍﻡ ﺣﻤﻴﺪ ﺗﺮﺩﻑ ﺑﻄﺎﺳﺘﻬﺎ ﺍﻟﻤﺰﻧﺠﺮﻩ ﻭﺗﺮﺟﻊ ﺗﺸﻤﺮ ﻣﻲ ﻣﻦ ﺻﺤﻴﺖ ﻓﺸﻠﺖ ﻣﺎﺍﻋﺮﻑ ﻟﻌﻨﺔ ﺍﻟﺴﺎﻋﻪ ﺍﻟﻲ ﺍﻧﻮﻟﺪﺕ ﺑﻴﻬﺎ ﻛﺮﻫﺖ ﺭﻭﺣﻲ ﻭﻛﺮﻫﺖ ﺍﻟﻮﺍﻗﻊ ﻟﻮ ﺑﺎﻗﻴﻪ ﻃﺎﻳﺮﻩ ﺑﺎﻟﺤﻠﻢ ﺍﻓﻀﻞ ... ﻛﻤﻠﺖ ﻭﻃﻠﻌﺖ ﻭﺧﻠﺘﻨﻲ ﺍﻧﺸﻒ ﺷﻌﺮﻱ ﻭﺍﺑﺪﻝ .. ﻛﻤﻠﻨﺎ ﻭﺭﺟﻌﻨﺎ ﺑﺲ ﺭﺟﻌﺖ ﺑﺲ ﺟﺴﺪ ﺍﻣﺸﻲ ﺑﺪﻭﻥ ﺭﻭﺡ ﺍﻛﻮ ﺷﻲ ﺍﻧﻜﺴﺮ ﺑﺪﺍﺧﻠﻲ ﺍﻛﻮ ﻓﺪ ﻗﻮﻩ ﺧﻔﻴﻪ ﺳﺤﺒﺖ ﺍﻟﺮﻭﺡ ﺍﻟﻲ ﺟﻨﺖ ﺍﻗﺎﻭﻡ ﺑﻴﻬﺎ ﺍﻟﺤﻴﺎﺓ ... ﺭﺟﻌﺖ ﻟﻠﺒﻴﺖ ﺍﺭﻳﺪ ﺑﺲ ﺍﻭﺻﻞ ﻟﻠﻐﺮﻓﻪ .. ﺷﻬﺎﻣﺔ : ﻫﺎﻱ ﺣﺒﻲ ﺍﻧﻴﻦ ﻟﻴﺶ ﻫﻴﺞ ﺗﻌﺒﺎﻧﻪ . ﻣﺎﻛﻮ ﺷﻲ ﻣﺎﻛﻮ ﺷﻲ .. ﺷﻬﺎﻣﺔ ﺯﻭﺟﺖ ﺍﺧﻮﻱ ﻛﺮﻳﻢ ﻭﺣﺒﺎﺑﻪ ﻟﺪﺭﺟﻪ ﺗﺘﻮﺳﻞ ﺑـ ﺍﺧﻮﻫﺎ ﺣﺘﻪ ﻳﻘﺒﻞ ﻳﺘﺰﻭﺟﻨﻲ ﺑﺲ ﻫﻮ ﻳﺮﻓﺾ ﻭﺣﻘﻪ ﻳﺮﻓﺾ ﻟﻴﺶ ﻳﺘﺰﻭﺝ ﻭﺣﺪﻩ ﺍﻛﺒﺮ ﻣﻨﻪ ﺑـ ﺧﻤﺲ ﺳﻨﻮﺍﺕ . ﻭﺻﻠﺖ ﻟـ ﺍﻟﻔﺮﺍﺵ ﺟﺎﻥ ﺣﻠﻢ ﺍﻭﺻﻠﻪ ﺷﻤﺮﺕ ﺟﺜﺘﻲ ﻭﺑﺠﻴﺖ ﻣﻦ ﻛﻞ ﻛﻠﺒﻲ ﻧﺰﻟﺖ ﺩﻣﻮﻉ ﻣﺴﺘﺤﻘﻪ ﺍﺩﻣﻮﻉ ﻻﺯﻡ ﺗﻨﺰﻝ ﻣﻦ ﺯﻣﺎﻥ ﺍﺩﻣﻮﻉ ﻣﺜﻞ ﺍﻟﺰﺭﻉ ﺍﻟﻲ ﺻﺎﺭ ﻧﺎﺿﺞ ﻭﻣﻨﺘﻈﺮ ﺍﻟﺤﺼﺎﺩ ﻣﺜﻞ ﺍﻟﺮﻭﺡ ﺍﻟﻤﺬﺑﻮﺣﻪ ﻣﺜﻞ ﺍﻟﺠﺮﺡ ﺍﻟﻌﻤﻴﻖ ﺍﻟﻤﺮﺷﻮﺵ ﻣﻠﺢ ﻫﻴﺞ ﺍﺣﺲ ﻫﻴﺞ ﺍﺭﻳﺪ ﺑﺲ ﺍﺧﻠﺺ ﺑﺲ ﺍﺧﺘﻔﻲ .. ﺍﻧﻴــــــــــــــــــﻦ ..... ﺧﻠﺺ ﻭﻗﺖ ﺍﻟﺮﺍﺣﻪ ﻫﺬﺍ ﺻﻮﺕ ﺍﻣﻲ ﺍﻛﻴﺪ ﻋﺪﻫﺎ ﺷﻲ ﺍﺭﻭﺡ ﺍﺷﻮﻓﻬﺎ . ـ ﻧﻌﻢ ﻣﺎﻣﺎ .. ـ ﺗﻌﺎﻟﻲ ﺍﻛﻠﻲ ﻣﺘﻐﺪﻳﺘﻲ ﺷﻮﻓﻲ ﺷﻠﻮﻥ ﺿﻌﻔﺎﻧﻪ ﺍﻟﺮﺟﺎﻝ ﻣﻦ ﻳﺠﻲ ﻳﺸﻮﻓﺞ ﺷﻨﻮ ﻳﺸﻮﻑ ﺍﻛﻠﻲ ﻭﺍﺳﻤﻨﻲ .. ـ ﺍﻱ ﺣﺎﺿﺮ ..... ﻳﻌﻨﻲ ﻣﻮ ﻉ ﻣﻮﺩﻱ ﻭﻻ ﻉ ﺻﺤﺘﻲ ﺍﻛﻴﺪ ﺍﻟﻌﺮﻳﺲ ﺍﻟﻤﻨﺘﻈﺮ ﻣﻦ ﻳﺠﻲ ﻳﻠﻜﺎﻧﻲ ﻣﻨﺘﻈﺮﺗﻪ ﻭﺳﻤﻴﻨﻪ ﻭﺣﻠﻮﻩ ﻭﻣﺮﺗﺎﺣﻪ ﺑﺲ ﺣﺘﻪ ﻳﻘﺒﻞ ﺍﻭ ﻳﻤﻜﻦ ﻳﺮﻓﺾ ﺑﻌﺪ ﻫﻮ ﺑﻜﻴﻔﻪ ﺍﻧﻲ ﺍﻫﻢ ﺷﻲ ﺍﻧﺘﻈﺮ ﻭﺑﺲ .. ﺧﻠﺼﺖ ﺍﻟﻐﺪﺓ ﻭﺑﻘﻴﺖ ﺍﺩﺭﺱ ﺍﻟﻄﺎﻟﺒﺎﺕ ﻳﺠﻮﻥ ﻭﺟﺒﺎﺕ ﻛﻞ ﻣﺘﺨﻠﺺ ﻣﺠﻤﻮﻋﻪ ﺗﺪﺧﻞ ﺍﻟﺜﺎﻧﻴﻪ ﻃﺎﻟﺒﺎﺕ ﺳﺎﺩﺱ ﻭﺍﻏﻠﺒﻬﻢ ﻋﻠﻤﻲ ﻭﻳﺮﺩﻭﻥ ﺍﻟﺘﺰﺍﻡ ﻭﺗﺮﻛﻴﺰ .... ﺧﻠﺼﺖ ﺗﺪﺭﻳﺲ ﻭﺍﺷﻮﻑ ﻛﺮﻳﻢ ﻳﻨﺘﻈﺮﻧﻲ ﻫﻮ ﻭﺍﻣﻲ .. ﻛﺮﻳﻢ : ﺍﻧﻴﻦ ﺑﻮﻳﻪ " ﺑﺪﻭﻥ ﻣﻘﺪﻣﺎﺕ ﺣﺠﻮﺍ ﻭﻳﺎﻱ ﻧﺎﺱ ﻋﻠﻴﺞ ﺑﺲ ﺍﻧﻲ ﻣﺎﺍﻋﺮﻑ ﺍﻟﻮﻟﺪ ﻣﻨﺘﻈﺮﻳﻦ ﺍﺣﻤﺪ ﻳﺠﻲ ﻭﻧﺴﺄﻟﻪ ﻋﻠﻴﻪ ﺍﻧﺘﻲ ﺷﺘﻜﻮﻟﻴﻦ ?... ﺍﻡ ﻛﺮﻳﻢ : ﺍﺷﺸﺸﺸﺸﺶ ﻫﻲ ﺷﻨﻮ ﺑﻜﻴﻔﻬﺎ ﺍﻧﻲ ﻣﻮﺍﻓﻘﻪ ﺧﻠﺺ .. ـ ﻭﺍﻧﻲ ﺻﺎﻓﻨﻪ ﺍﻣﻲ ﺗﻐﻤﺰ ﻣﻦ ﺟﻮﻩ ﺍﻟﻲ ﺟﻮﻩ ﻋﻮﺩ ﻫﺎﻱ ﺑﺮﻛﺎﺕ ﺍﻟﻄﺎﺳﻪ ﺍﻟﻤﺰﻧﺠﺮﻩ . ﻫﻪ  😅 ---- ﺍﻡ ﻛﺮﻳﻢ : ﺍﺷﺸﺸﺸﺸﺶ ﻫﻲ ﺷﻨﻮ ﺑﻜﻴﻔﻬﺎ ﺍﻧﻲ ﻣﻮﺍﻓﻘﻪ ﺧﻠﺺ .. ـ ﻭﺍﻧﻲ ﺻﺎﻓﻨﻪ ﺍﻣﻲ ﺗﻐﻤﺰ ﻣﻦ ﺟﻮﻩ ﺍﻟﻲ ﺟﻮﻩ ﻋﻮﺩ ﻫﺎﻱ ﺑﺮﻛﺎﺕ ﺍﻟﻄﺎﺳﻪ ﺍﻟﻤﺰﻧﺠﺮﻩ . ﻫﻪ ﺍﻟﻤﻬﻢ ﻭﺍﺣﻨﺎ ﺑﻌﺪﻧﺎ ﻧﺤﺠﻲ ﺩﺧﻞ ﺍﺣﻤﺪ .. ﻭﺣﺠﻪ ﻭﻳﺎﻩ ﻛﺮﻳﻢ ﻭﺍﺣﻤﺪ ﻣﻦ ﺳﻤﻊ ﺑـ ﺍﺳﻢ ﺍﻟﻮﻟﺪ ﺍﺗﺨﺒﻞ ﻭﻋﻠﻪ ﺻﻮﺗﻪ ﻭﺻﺎﺭﺕ ﻫﻮﺳﻪ ﻭﻛﺮﻳﻢ ﻧﻔﺲ ﺍﻟﺸﻲ ﻫﻢ ﺑﺲ ﻳﺼﻴﺢ ﻭﺍﻧﻲ ﺑﻌﻴﺪ ﻋﻨﻬﻢ ﺍﺳﻤﻊ ﺑﺲ ﺍﻟﺼﻴﺎﺡ ﻭﺍﻣﻲ ﺍﺗﺴﻜﺖ ﺑﻴﻬﻢ ﻭﺍﺗﺮﺯﻝ ... ﻛﺮﻳﻢ : ﺑﻮﻳﻪ ﺗﻌﺎﻟﻲ ﺍﺳﻤﻌﻲ ﺣﺠﻲ ﺍﻣﺞ ﺗﺮﺿﻴﻦ ﺑﻲ ﺍﻧﺘﻲ !.. ﺍﺣﻤﺪ : ﻭﺭﺑﻲ ﻭﻣﺎﺍﻋﺒﺪ ﺣﺘﻪ ﻟﻮ ﺗﺮﺿﺎ ﺍﻧﻲ ﺍﻣﻮﺗﻬﺎ ﻭﻣﺎﺍﻧﻄﻴﻬﺎ ﻟﻬﺬﺍ . ﺍﻧﻴﻦ : ﺷﻨﻮ ﺍﻟﻘﺼﻪ ﺑﺸﻨﻮ ﺍﺭﺿﺎ ﻭﺍﻟﻠﻪ ﻣﺪﺍ ﺍﻓﺘﻬﻢ ﺷﻲ ﻓﻬﻤﻮﻧﻲ ?.. ﺍﻡ ﻛﺮﻳﻢ : ﺍﻧﻲ ﻭﺍﻓﻘﺖ ﻭﺧﻠﺺ ﺑﻌﺪ ﺣﺠﻲ ﺯﺍﻳﺪ ﻣﺎﺍﺭﻳﺪ ﻭﻟﺤﺪ ﻳﺤﺸﻲ ﺑﺮﺍﺳﺞ ﺗﺮﻩ ﻳﺮﺩﻭﻧﺞ ﺍﺗﺨﺪﻣﻴﻦ ﻧﺴﻮﺍﻧﻬﻢ ﺑﻌﺪﻳﻦ ﻭﻳﻄﻠﻌﻮﻥ ﻋﻴﻮﺏ ﺑﺎﻟﻮﻟﺪ ﻭﺑﻌﺪﻳﻦ ﺍﻟﻤﺮﺃﺓ ﺗﺘﺤﻤﻞ ﻛﻠﺸﻲ ﻣﻮ ﺍﺣﻨﺎ ﺷﻔﻨﺎ ﺍﺷﻜﺎﻝ ﻭﻣﺮﺕ ﻉ ﺭﻭﺳﻨﺎ ﻣﺤﺠﻴﻨﻪ ﻭﻻ ﻛﻠﻨﺎ ﺑﺲ ﺑﻨﺎﺕ ﻫﺬﺍ ﺍﻟﺰﻣﻦ ﻳﺪﻭﺭﻥ ﺯﻟﻢ ﻻ ﻣﻮ ﺯﻟﻢ ﻳﺮﺩﻧﻬﻢ ﺩﺟﺎﺝ .. ﻭﺍﻟﻠﻪ ﻳﺎ ﺍﻟﻠﻪ .. ﻛﺮﻳﻢ : ﺷﻮﻓﻲ ﺍﻧﻴﻦ ﻣﺎﻟﺞ ﺷﻐﻞ ﺑﺤﺠﻲ ﺍﻣﻲ ﺍﻟﻮﻟﺪ ﻣﻮ ﺯﻳﻦ ﻭﺍﺧﻮﺝ ﻳﻌﺮﻓﻪ ﻭﺍﻟﻠﻪ ﺍﻟﻌﻈﻴﻢ ﻳﺎ ﺍﺧﺘﻲ ﺍﻧﺘﻲ ﺑﻤﻜﺎﻥ ﺑﻨﺘﻲ ﻓﺮﺡ ﻭﺍﺑﺪ ﻣﺎﺍﻓﺮﻕ ﺑﻴﻨﻜﻢ ﻭﺍﻧﻲ ﺍﻟﺮﺑﻴﺘﺞ ﺑﻌﺪ ﻭﻓﺎﺓ ﺍﻟﻮﺍﻟﺪ ﻓـ ﻣﺴﺘﺤﻴﻞ ﺍﺧﻠﻴﺞ ﺍﺗﻜﻮﻧﻴﻦ ﺫﻟﻴﻠﻪ ﺍﻭ ﻳﻨﻘﺴﺞ ﺷﻲ ﺍﻭﻋﺪﺝ ﺍﻱ ﻗﺮﺍﺭ ﺗﺘﺄﺧﺬﻳﻨﻪ ﺍﻧﻲ ﻭﻳﺎﺝ ﻭﺑﺪﻭﻥ ﻧﻘﺎﺵ ﺑﺲ ﺍﻭﻝ ﺷﻲ ﺍﺳﻤﻌﻲ ﻣﻦ ﺍﺣﻤﺪ ﻭﺣﻜﻤﻲ ﻋﻘﻠﺞ .. ﺍﺣﻤﺪ : ﻟﺞ ﺍﻧﻴﻦ ﻫﺬﺍ ﻭﺍﺣﺪ ﺳﻜﻴﺮ ﻭﺻﺎﺣﺐ ﻛﻴﻒ ﻭﻣﻮ ﺧﻮﺵ ﺍﺩﻣﻲ ﻻ ﻣﻮ ﺑﺲ ﻫﻴﺞ ﺑﻌﺪ ﺍﻛﺜﺮ ﺗﺪﺭﻳﻦ ﻣﻦ ﻳﺘﻌﺎﺭﻙ ﻭﻳﻪ ﺍﻣﻪ ﻳﻀﺮﺑﻬﺎ ﺑﺎﻟﺸﺎﺭﻉ ﻛﺪﺍﻡ ﺍﻟﻨﺎﺱ ﻭﻳﻔﺸﻠﻬﺎ ﻭﻣﻦ ﻏﻴﺮ ﻛﻞ ﻓﺘﺮﻩ ﻭﺍﻟﺜﺎﻧﻴﻪ ﻣﺴﺠﻮﻥ ﺑﻘﻀﻴﻪ ﺷﻜﻞ ﻭﺍﻣﻲ ﻣﺘﻔﻜﺮ ﺑﺲ ﺍﺗﺮﻳﺪ ﺍﺗﺰﻭﺟﺞ ﺗﺮﻩ ﻣﻴﺼﻴﺮ ﻫﻴﺞ ﺍﻧﺘﻲ ﻋﺎﻗﻠﻪ ﻭﻣﺪﺭﺳﻪ ﻭﻫﺬﺍ ﺍﺑﺪ ﻣﻴﻠﻮﻛﻠﺞ ﺍﻟﻮﺿﻊ ... ﺍﻧﻴﻦ : ﺍﻧﻲ ﻣﺎﺍﺭﻳﺪ ﺍﺗﺰﻭﺝ ﻫﻴﺞ ﺷﺨﺺ ﻭﺍﻧﻲ ﺍﻟﻜﻠﻤﺔ ﺍﻻﻭﻟﻰ ﻭﺍﻻﺧﻴﺮﻩ ﺑﻜﻴﻒ ﻛﺮﻳﻢ ﻫﻮ ﻳﺸﻮﻑ ﺷﻨﻮ ﺍﻟﺼﺢ ﺍﻟﻲ ﻭﻳﺴﻮﻱ .. ﺍﻡ ﻛﺮﻳﻢ : ﻭﺍﻟﻠﻪ ﻃﺎﻟﻌﻠﺞ ﺍﻟﺴﺎﻥ ﻭﻟﺞ ﺗﺤﺠﻴﻦ ﻗﺒﻞ ﻻ ﺍﻧﻪ ﺍﺭﺩ ﻉ ﻫﺬﻭﻝ ﺍﺧﻮﺗﺞ ﻫﺴﻪ ﺻﺎﺭﻭﺍ ﻳﺤﺒﻮﻧﺞ ﺍﻟﺠﺬﺍﺑﻴﻦ ﻫﻤﻬﻢ ﺑﻴﻮﺗﻬﻢ ﻭﻧﺴﻮﺍﻧﻬﻢ ﻭﺟﻬﺎﻟﻬﻢ ﻭﺍﻧﺘﻲ ﻣﺤﺪ ﺑﺤﺎﻟﺞ ﺧﻠﻒ ﺍﻟﻠﻪ ﻋﻠﻴﻪ ﺍﻧﻲ ﺧﻠﻴﺘﺞ ﺗﻮﺻﻠﻴﻦ ﻭﺍﺩﺭﺳﻴﻦ ﻭﻟﻮ ﻋﻠﻴﻬﻢ ﻣﻦ ﺯﻣﺎﻥ ﻛﻌﺪﻭﺝ ﺑﺎﻟﺒﻴﺖ .. ﺧﻠﺺ ﺗﺰﻭﺟﻴﻦ ﻫﺬﺍ ﺍﻟﻤﺘﻘﺪﻡ ﻭﻣﺎﻋﻨﺪﻱ ﻏﻴﺮ ﺣﺠﻲ . ﺍﻧﻴﻦ : ﺑﺲ ﺍﻧﻲ ﺭﺍﻓﻀﻪ ﻳﻌﻨﻲ ﻣﺎﺍﺗﺰﻭﺟﻪ ﻣﺎﺍﺭﻳﺪﻩ ﻣﺎﺍﺭﻳﺪﻩ ﻭﺍﻟﻠﻪ ﻣﻠﻴﺖ ﻳﻌﻨﻲ ﻻﺯﻡ ﺍﺗﺰﻭﺝ ﺍﻱ ﻭﺍﺣﺪ ﻳﺪﻙ ﺍﻟﺒﺎﺏ ﻳﻮﻡ " ﺷﻮﻓﻲ ﺷﻨﻮ ﻳﺴﻮﻱ ﺑـ ﺍﻣﻪ ﻳﻀﺮﺑﻬﺎ ﻭﻳﻬﻴﻨﻬﺎ ﻛﺪﺍﻡ ﺍﻟﻨﺎﺱ ﻫﺎﻱ ﻭﻫﻲ ﺍﻣﻪ ﺳﺒﺐ ﻭﺟﻮﺩﻩ ﺑﺎﻟﺤﻴﺎﺓ ﻟﻌﺪ ﺍﻧﻲ ﺷﻴﺴﻮﻱ ﺑﻴﻪ . ـ ﺩﺧﻠﺖ ﻏﺮﻓﺘﻲ ﻭﺳﺪﻳﺖ ﺍﻟﺒﺎﺏ ﻭﺍﺳﻤﻊ ﻛﺮﻳﻢ ﻭﺍﺣﻤﺪ ﻳﻘﻨﻌﻮﻥ ﺑﻴﻬﺎ ﻭﻫﻲ ﺑﺲ ﺗﺴﺐ ﻭﺗﻐﻠﻂ ﻋﻠﻴﻪ ... ﺻﺪﻙ ﺍﻟﻮﺿﻊ ﻣﻴﻨﺴﻜﺖ ﻋﻨﻪ ﻣﺎﺍﻋﺮﻑ ﻭﻳﻦ ﺍﺭﻭﺡ ﻳﻌﻨﻲ ﺍﺗﺰﻭﺝ ﻭﺍﺣﺪ ﻣﺎﻋﻨﺪﻩ ﺫﺭﺓ ﺍﻧﺴﺎﻧﻴﻪ ﻭﻻ ﻛﺮﺍﻣﻪ ﻭﺟﻤﺎﻟﻪ ﺳﻜﻴﺮ ﻭﻫﻲ ﻣﻜﻴﻔﻪ ﺷﻠﻮﻥ ﺍﺗﻔﻜﺮ ﻫﻴﺞ ﺷﻠﻮﻥ ﻭﺍﻟﻠﻪ ﻣﺎﺍﺩﺭﻱ . ﺷﻨﻮ ﻫﺎﻱ ﺍﻧﻲ ﺷﻨﻮ ﻻﺑﺴﻪ ﺷﻨﻮ ﻫﺬﺍ ﻭﺟﻬﻲ ﺷﻮﻛﺖ ﺍﻧﻲ ﺍﻧﺨﻄﺒﺖ ﻟﻴﺶ ﻻﺑﺴﻪ ﻓﺴﺘﺎﻥ ﻋﺮﺱ .. ﻇﻠﻴﺖ ﻭﺍﻛﻔﻪ ﻭﺳﻂ ﺍﻟﻐﺮﻓﻪ ﻭﺣﺎﻳﺮﻩ ﻭﺍﻧﻲ ﺑﻜﺎﻣﻞ ﺯﻳﻨﺘﻲ ﻭﺍﻧﺘﻈﺮ ﺍﻟﻌﺮﻳﺲ ﺍﻟﻤﺠﻬﻮﻝ ﻭﺍﻓﻜﺮ ﺍﻧﻲ ﺷﻮﻛﺖ ﺍﻧﺨﻄﺒﺖ ﻭﺷﻠﻮﻥ ﻣﺎﺍﺗﺬﻛﺮ ﺍﻭﻭﻭﻭﻭﻩ ﺍﺟﺖ ﻓﻜﺮﻩ ﺑﺮﺍﺳﻲ ﺑﺲ ﻻ ﺻﺪﻙ ﺍﻣﻲ ﻭﺍﻓﻘﺖ ﻭﺍﺗﺮﻳﺪ ﺍﺗﺰﻭﺟﻨﻲ ﻟـ ﻫﺬﺍ ﺍﻟﺴﻜﻴﺮ ... ﺑﻌﺪﻧﻲ ﺑﺤﻴﺮﻩ ﻭﻧﻔﺘﺢ ﺍﻟﺒﺎﺏ ﻭﺩﺧﻠﻦ ﺧﺎﻟﺘﻲ ﺳﻌﺎﺩ ﻭﺷﻬﺎﻣﺔ ﻭﺭﻳﻢ ﺯﻭﺟﺔ ﺍﺣﻤﺪ ﻭﻓﺮﺡ ﻭﺑﻨﺎﺕ ﺻﺪﻳﻘﺎﺗﻲ ﻭﺍﻟﻐﺮﻓﻪ ﺍﻧﻤﻠﺖ ﻧﺎﺱ ﻭﻣﺒﺮﻭﻙ ﻳﺎ ﻋﺮﻭﺳﻪ ﻭﺷﻨﻮ ﻫﺬﺍ ﺍﻟﺠﻤﺎﻝ ﻭﻏﻴﺮﻩ ﻭﺍﻧﻲ ﻣﺎﺍﻋﺮﻑ ﺍﻟﻤﻦ ﻣﺘﺰﻭﺟﻪ ... ﺳﺤﺒﻨﻲ ﻣﻦ ﺍﻳﺪﻱ ﻭﺍﺧﺬﻧﻲ ﻟـ ﺍﻟﺼﺎﻟﻪ ﻣﺎﻝ ﺑﻴﺖ ﻭﺍﻣﻲ ﻓﺮﺣﺎﻧﻪ ﻭﺍﺗﻬﻠﻬﻞ ﻭﺍﺗﻬﻮﺱ .. ﺧﻠﻮﻧﻲ ﺑﺎﻟﻜﻮﺷﻪ ﻭﻳﻄﺸﻦ ﺍﻟﺠﻜﻠﻴﺖ ﻭﺍﻟﻬﻮﺳﺎﺕ ﻭﺍﻧﻲ ﺑﺲ ﺻﺎﻓﻨﻪ ﺷﻨﻮ ﺍﻟﻘﺼﻪ ﻣﻨﻮ ﺍﻟﻌﺮﻳﺲ ?