سلام بنات شلونكم شخباركم؟ انا من حوامل ابريل ، و ولادتي المفترض ١٨/١ ولكن ولدت ٢٦/١٢ ، ٣٦ اسبوع و ٥ ايام وهذا مولودي الاول ، والله ي حبايبي كنت اللعب ببجي 😂🤣😭 مع اصدقائي على ساعه ١٢ الليل ، وانا اللعب مرة وحده حسيت مثل الشي بينزل ! قلت يمكن طبيعي مثل كل مره بس حسيت ان خلاص قاعد ينزل و بيطلع ، ( ماية الراس ) على ساعه ١٢ ونص انكب ، بس مو كل الماي ، بقيت في بيتي الى ساعه ١٢ ونص انتضر الماي شوي يخف لان كان ينزل دفعات مو مع بعض ، كل ما اتحرك ينزل شوي ، لين خفت الكمية اللي كانت تنزل بحيث لو لبست كوتكس ( حفاظة 😂😭 ) كان يمسك معاي شوي ، ورحت المستشفى لان كنت خايفه يصير للبيبي شي و اول بيبي قلت معليه اهما يتابعون معاي و يجوفو الوضع ، و طبعا نزل الماي بدون الم طلق ! لمى رحت جيكت لي قالت لي ١ سانتي ، و ف السونار قالو لي للحين في ماي مع الجنين ، و كل شي تمام الحمدالله بس قالو ترقيد عشان يتابعو حالتي لان ولاده المفترض اذا ماي الراس انبطت ، و والله حبايبي من ساعه ٢ الليل الى ساعه ٨ المفرب 🙂 وانا انتضر يجيني الطلق من الله بس ما اجاني شي !! و تخطيط البيبي كان تمام الحمدالله بس تخطيط الطلق ماكان في اي طلق مجرد شي خفيف🥺🤦🏻‍♀️. ع ساعه ٨و ١٠ اجتني الدكتوره تجوف جم سانتي طلع ٢ وشي و بطت ماي الراس زياده و رفعوني المخاض ! لمى رحت المخاض حسيت بألام خفيفه الطلق بدى يزيد لان اهيا بطت الماي ! و نطرو علي عشان يزيد الطلق من ٨ونص الى ساعه ١١ الليل لكن مافي اي تطور ! كان خلاص تقريبا راح اصك ٢٤ ساعه من انبطت ماي البيبي ، عطوني ابرة ظهر و قالو لي هذي الابره تنيم ! و ان شاءالله راح تكوني انفتحتي لمى تقعدين ! وانا مادري حطو لي طلق صناعي في السيلان ، اوتعيت على الالم طبعا ! على ساعه ١٢ ونص تقريبا ! يعني مفعول الابره بقى ساعه وشي بس ، عاد كان الالم قوي قلت اكيد انفتحت ، قلت معليه هانت بولد الحين !! اجت تجوف جم سانتي طلع بس ٤ سانتي !!!!!!!!!! صادني احباط مو طبيعي في نص الولاده ! اقول في بالي ٤ سانتي والم جذي !! ١٠ سانتي شلون بتحمله ؟ في ذاك الوقت كفرت😂😭!!! بلشتهم فيني بلشه مو طبيعيه !! كنت اجودهم من ايدهم ماخليهم يروحون ! اقول لهم ودوني عملية خلاص مابي اولد طبيعي!!! يقولون لي جوفي انتي التخطيط ! تخطيط البيبي و الطلق ! كل شي بيرفكت و ممتاز ! شلون تبين نوديج عملية؟ مستحيل !!! لو شنهو قلتي و سويتي مابودونج عملية ، تقولين على الفاضي😨! قلت لها ماقدر اولد !! بموت 😱😂😭!! صج ذاك الوقت كنت اتشهد احسني خلاص ماقدر اولد و مو قدها ابدا !!! قلت لها عطيني شي ثاني يخفف الالم !! اي شي !! من كثر الالم كنت ارتجف !! و فوقها كنت بردانه لدرجة ضروسي تتصافق 🌚🥺!! تقول لي ماقدر اعطيج ابرة ثانيه الابره الثانيه لازم تكون بعد الاولى ب ٦ ساعات وانتي ماطفتي ٦ ساعات لو اعطيج اقين يعني تقولين لي خلي حياتي و حياة البيبي ف خطر ، مانقدر نعطيج الابرة خلاص ، صرت اقول لها ابي اي شي !!!! يخفف !!! تقول لي في غاز مخدر ! مادري شنهو هلغاز نسيت اسمه لكن مو اكسجين😂😂 ! تقول لي هذا يلين الرحم و يخليه يكون اطرى و ينفتح اسرع! لكن مايخفف الالم !!! قلت لها معليه عطيني اياه!! تقول لي اوكي لكن مخلص ! لازم يجون و يشحنونه و بيتاخرون شوي !!! قلت لها معلييييه خله يشحنونه و جيبوه لي!!! اهم شي ، شي يسرع ولادتي و اطلع بسلامة !! قالت لي معليه طبعا من ١٢ ونص لين ٢ كنت انتضره يعني ساعه ونص بلالم 😂 كنت انتضره ! وصلني ساعه ٢ الليل !! و صارت تقول لي تنفسيه مع كل طلقة تجي ! يعني مع كل الم ! قلت لها اوكي !! صارت تقول لي لا تصارخين ! الصراخ مابفيد ف شي ! حاولي تتنفسين و ماتضغطين ع روحج لان اطا ضغطتي ع روحج و على تحت الالم يصير اقوى !! تنفسي طبيعي و حاولي ترخييين ! عشان الالم يكون اخف !! و تولدين بسرعه و تنفتحين اسرع لان اذا ترخين ينفتح اسرع!! وبس والله ، صرت ما اصارخ ولاشي و صرت ارخي و اتنفس بس على نهايه الطلقة كان الم فضيع ف على النهاية شوي تصير ونة 🥺🥺!! بس تحملت الالم !!!! و قلت لها على ساعه ٢:٤٠ دقيقه تعالي جيكي جم سانتي انفتحت قالت لي نطري بعد شوي !! اجت ساعه ٣ الفجر ، قلت لها تعالي جوفي 😅🤦🏻‍♀️!! جفتها تتحلطم واهيا تلبس القفاز عشان تجي تجيك ! الا تقول لي ١٠ سانتي ولاده😳😳😳😳!!!! انفتحت من ٤ سانتي ساعه ١٢ ونص الى ١٠ سانتي ٣ الفجر يعني من حطو علي طلق صناعي ٤ ساعات ونص و انفتحت ١٠ سانتي ، طبعا انا انصدمت و ماصدقت ! لان كنت متحمله الالم 🤭😂، توقعت ٧ سانتي لو ٦ بعد!! بس لان كنت اقول ي ربي ساعدني ي ربي ساعدني مع كل مره يجيني الالم كنت ادعي ربي والله من كثر ما احسني كفرت و استسلمت ! قلت مافي غير ربي يساعدني !!! و صرت ادعيه بس وصلت ١٠ سانتي بدون ما اتوقع!! و كنت متحمله الالم! سبحان الله🥺🥺🥺❤️. و بس والله عدلو السرير و عدلو كل شي عشان ولادة و ساعه ٣:١٩ دقيقة ولدت🥺 والحمدالله رب العالمين ، خروج روح من روح شي مو سهل والله . و الجنة تحت اقدام الامهات مو عبث . والله يعطي العافية لكل ام كانت قدها و قدود و قدرت تولد بسلامة 🥺❤️. المرأة شي عظيم والله !! وبس والله ، ولدت ٣٦ اسبوع و ٥ ايام تاريخ ٢٦/١٢/٢٠١٨ اخذت في ولادتي ٢٨ ساعه !! اخذ لي تقريبا طول اليوم على امل يجيني طلق طبيعي و من حطو علي الطلق الصناعي لين توسعت ١٠ سانتي اخذ لي ٤ ساعات ونص بدأ وياي من ساعه ١٢ ونص الليل ! و انتهينا ٣:١٩ الفجر بعد يوم كامل 🤦🏻‍♀️. الحمدالله.